«ءتىپتى اياق باسا الماي قالدىم». تاريحتى وزگەرتكەن جەلاياق ارۋلار
قازىر ايەلدەر ءۇشىن مارافونعا قاتىسىپ، جۇگىرۋمەن اينالىسۋ ماسەلە تۋدىرمايدى. الايدا بۇدان ءبىر عاسىر بۇرىن ايەلدەر ءۇشىن دە بۇل سپورت تۇرىمەن اينالىسۋ وڭاي بولا قويعان جوق.
Massaget.kz ءتىلشىسى «قايتالانباس تۇلعا» ايدارىندا تاريحتى وزگەرتكەن جەلاياق ارۋلار تۋرالى باياندايدى.
ءوزى عانا ەمەس، وزگە ايەلدەر بولاشاعى ءۇشىن كۇرەسكەن ادامداردىڭ ءبىرى - بوببي گيبب.
روبەرتا لۋيزا گيبب نەمەسە جاي عانا بوببي گيبب - بوستون مارافونىن جۇگىرىپ شىققان العاشقى ايەل. 1966 -جىلى 23 جاستاعى بوببي بوستون سپورت اسسوتسياتسياسىنا مارافونعا قاتىسۋ تۋرالى ءوتىنىش جىبەرەدى، الايدا وعان رۇقسات ەتىلمەيدى. سول كەزدە اسسوتسياتسيا باسشىسى ۋيلل كلوني «ايەلدەر فيزيولوگيالىق قابىلەتسىزدىگىنىڭ كەسىرىنەن جارىسقا قاتىستىرىلمايدى» دەپ جاۋاپ بەرگەن ەدى.
بوببي «بوستونعا ماحابباتپەن» (To Boston with Love) كىتابىندا بۇل مارافونعا 2 جىل بويى كۇندە جۇگىرىپ دايىندالعانىن جازعان. ول مەدبيكەلەرگە ارنالعان اياق كيىم كيىپ، نۇسقاۋلىقسىز، جاتتىققان.
1966-جىلى مارافون كۇنى بوببي اعاسىنىڭ شالبارىن كيىپ، شاشىن جاسىرىپ ستارت باستالاتىن جەردىڭ قاسىنداعى اعاش ارتىندا تىعىلىپ تۇرعان. ول ونى قاتىستىرماي، ءتىپتى سوتتاپ جىبەرە مە دەپ قورىققانىن ايتتى. كەرىسىنشە، ونىڭ قىز ەكەنىن بىلگەن ەر ادامدار وعان قولداۋ ءبىلدىرىپ، ونى توقتاتپاق بولعاندارعا قارسى تۇرعان.
32 شاقىرىمنان كەيىن اياعى قاناي باستاعان، سەبەبى ايەلدەرگە ارنالعان اياق كيىم بولماعان سوڭ، ەرلەرگە ارنالعانىن كيۋگە ءماجبۇر بولعان.
«3 اق شاقىرىم قالعان ەدى، ال مەن ءتىپتى اياق باسا الماي قالدىم»، - دەيدى ايەل ەستەلىكتەرىنىڭ بىرىندە.
بوببي 540 ادامنىڭ اراسىندا العاشقى ۇشتىك قاتارىندا اياقتادى. ول مارافوندى 3 ساعات 21 مينۋت 40 سەكۋند جۇگىرگەن.
ماسساچۋسەتس گۋبەرناتورى مارەگە ارنايى كەلىپ، بوببيدىڭ قولىن الۋ ءۇشىن كۇتكەن. وسى ءبىر تاريحي ساتتەن كەيىن اراعا 6 جىل سالعاننان كەيىن 1972 -جىلى ايەلدەرگە مارافون جۇگىرۋگە رۇقسات ەتىلدى.
بۇگىندە بوببي گيبب 76 جاستا. ول ءالى كۇنگە دەيىن كۇنىنە كەم دەگەندە ءبىر ساعات جۇگىرەدى. ايەل سان- ديەگوداعى كاليفورنيا ۋنيۆەرسيتەتىندە زەرتتەۋشى بولىپ جۇمىس ىستەيدى. بۇگىندە بوببيدىڭ ەسىمىن كوپ ادام بىلمەسە دە، ول ايەلدەردىڭ بولاشاعىنا ولشەۋسىز ۇلەس قوسقانى ءسوزسىز.
مارافونشى ايەلدەر ءومىرىنىڭ تۇبەگەيلى وزگەرۋىنە ات سالىسقان تاعى ءبىر ايەل - كەترين شۆيتتسەر.
كەلەسى جىلى، ياعني 1967-جىلى كەترين ەسىمىن «ك. ۆ. شۆيتتسەر» دەپ كورسەتىپ، مارافونعا تىركەلەدى. بۇل ەسىمنەن تىركەلۋشىنىڭ ەر ادام نە ايەل ەكەنىن ءتۇسىنۋ مۇمكىن ەمەس ەدى. وسىلايشا كەترين ءوزىنىڭ ءنومىرىن الىپ، جارىسقا كەلەدى.
ۇيىمداستىرۋشىلاردىڭ ءبىرى ونى يتەرىپ شىعارماقشى بولادى.
ءبىراق سول كەزدە كەترينگە جىگىتى كومەكتەسەدى. ول قىزدى شىعارماق بولعان ادامدى يتەرىپ قۇلاتادى.
«ول مەنى يتەرمەك بولدى، ءبىر كەزدە جىگىتىم وعان جۇگىرىپ بارىپ، قۇلاتىپ جىبەردى. ول ورنىنان ۇشىپ كەتتى. جىگىتىم ۇيىمداستىرۋشىلاردىڭ ءبىرىن ۇرىپ جىبەرگەنى ءۇشىن قورقىپ كەتتىم. شىنىمەن، قاتتى ۇرەيلەندىم. ءبىراق ءبارى وزگەرگەنىن ءتۇسىندىم. ءبىر كەزدە جارىستاعى ماقساتىم «ايەلدىڭ بار كۇشىن كورسەتۋگە» اينالدى»، - دەيدى كەترين.
بوببي مەن كەترين ارقاسىندا ايەلدەر 1972 -جىلى بوستون مارافونىنا رەسمي تۇردە قاتىسۋعا رۇقسات الدى.
