ءتىل ساياساتىن دامىتۋدىڭ 6 جىلدىق تۇجىرىمداماسى بەكىتىلدى
پرەمەر-مينيستر ءاليحان سمايىلوۆ «قازاقستان رەسپۋبليكاسىندا ءتىل ساياساتىن دامىتۋدىڭ 2023-2029-جىلدارعا ارنالعان تۇجىرىمداسىن بەكىتۋ تۋرالى» ۇكىمەت قاۋلىسىنا قول قويدى، دەپ حابارلايدى Kazinform.
ءمالىم بولعانداي، تۇجىرىمداماداعى جوسپارلاردى ورىنداۋ مەملەكەتتىك ءتىلدى قوعامنىڭ بارلىق سالاسىندا قولدانۋ اياسىن كەڭەيتۋگە جانە ونىڭ مارتەبەسىن ارتتىرۋعا تىكەلەي ىقپال ەتپەك.
تۇجىرىمداما 6 بولىمنەن جانە ءىس-قيمىلدار جوسپارىنان تۇرادى.
ايقىندالعان باستى مىندەتتىڭ ءبىرى - قازاق ءالىپبيىن لاتىن قارپىنە كوشىرۋ. ول جۇمىستار ءالىپبي ناقتى نورماتيۆتىك قۇجاتتارمەن بەكىتىلگەننەن كەيىن كەزەڭ-كەزەڭىمەن ىسكە اسىرىلادى.
جالپى، تۇجىرىمدامانى ىسكە اسىرۋ اياسىندا 2029-جىلعا قاراي مىنا ناتيجەلەرگە جەتۋگە مۇمكىندىك بەرمەك:
- رەسپۋبليكا بويىنشا قازاق تىلىندە سويلەيتىن تۇرعىنداردىڭ ۇلەسى -84 پايىز؛
- ءۇش تىلدە سويلەيتىن تۇرعىنداردىڭ ۇلەسى - 32 پايىز؛
- جاڭا ءالىپبي مەن ەملە ەرەجەسىن وقىتۋ كۋرسىمەن قامتىلعان تۇرعىندار ۇلەسى - 15 پايىز؛
- ورتالىق مەملەكەتتىك جانە جەرگىلىكتى اتقارۋشى ورگانداردىڭ مەملەكەتتىك تىلدە ءىس جۇرگىزۋ ۇلەسى - 94 پايىز؛
- قازاق ءتىلىنىڭ لاتىن گرافيكالى ءالىپبيىنىڭ ەملە ەرەجەسىنە نەگىزدەلگەن تەرمينولوگيالىق قوردىڭ ۇلەسى - 40 پايىز.
قاۋلى قول قويىلعان كۇننەن، ياعني 16- قازاننان باستاپ كۇشىنە ەندى.
