ءتورت تۇرىكمەنستاندىق سپورتشى حاربين قىسقى ازيا ويىندارىنان شەتتەتىلدى
حاربين. KAZINFORM - تۇرىكمەنستاندىق 4 سپورتشى قىتايدىڭ حاربين قالاسىندا ءوتىپ جاتقان Ⅸ قىسقى ازيا ويىندارىنان شەتتەتىلدى.
حوككەيدەن ەرلەر اراسىنداعى توپتىق كەزەڭنىڭ كەزەكتى ماتچىندا تۇرىكمەنستان قۇراماسى قىتايلىق گونكونگ قۇراماسىمەن كەزدەسىپ، 1:5 ەسەبىمەن جەڭىلىپ قالدى. ويىن اياقتالىسىمەن ەكى كوماندا اراسىندا توبەلەس باستالىپ، سالدارىنان گونكونگ ساپىنداعى ءۇش حوككەيشى جەڭىل جاراقات الدى.
حالىقارالىق شايبالى حوككەي فەدەراتسياسى (IIHF) توبەلەسكە قاتىسقان 4 تۇرىكمەنستاندىق حوككەيشىنىڭ ارەكەتىن قاساقانا شابۋىل دەپ باعالاپ، ازيادانىڭ قالعان ويىندارىنان تولىقتاي شەتتەتى.
سونىمەن قاتار گونكونگ ارنايى اكىمشىلىك ايماعىنىڭ باسشىسى جون لي كاچحيۋ توبەلەستى قاتاڭ سىناپ، جاراقات العان سپورتشىلاردىڭ كوڭىلىن سۇرادى.
ايتا كەتەيىك، حوككەيدەن قازاقستان ەرلەر قۇراماسى قىسقى ازيا ويىندارىنىڭ ا توبىندا بارلىق كەزدەسۋدە جەڭىسكە جەتىپ، پلەي-وففقا ءبىرىنشى ورىنمەن شىقتى.
اۆتور
مۇحتار قاليموللا ۇلى
