ءتۇسىپ قالعان تىستەردىڭ ورنىنا جاڭاسىن وسىرەتىن ءدارى بار
استانا. قازاقپارات - ستوماتولوگتار تىستەردى قالپىنا كەلتىرۋگە ارنالعان جاڭا پرەپاراتتى سىناپ كوردى. ونىڭ تيىمدىلىگىنىڭ جوعارى ەكەنىن سىناقتار دالەلدەگەن.
جاڭا تىستەر وسىرەتىن پرەپاراتتىڭ سيپاتى امەريكالىق bgr.com تانىمدىق سايتىندا جاريالانعان.
العاشىندا عالىمدار تىستەردى قالپىنا كەلتىرۋگە ارنالعان جاڭا پرەپارات 2024 -جىلدىڭ سوڭىنا دەيىن ادامداردا سىنالاتىنىن حابارلاعان ەدى. جاپوندىق ستوماتولوگتار جاڭا پرەپاراتتىڭ كلينيكالىق سىناقتارىن قازان ايىندا كيوتو ۋنيۆەرسيتەتىنىڭ اۋرۋحاناسىندا باستادى.
پرەپارات ادامنىڭ قىزىل يەكتەرىمىزدىڭ استىنا جاسىرىلعان قۇپياعا نەگىزدەلگەن. عالىمدار ادامداردا جانە باسقا سۇتقورەكتىلەردىڭ كوپشىلىگىندە وسە الاتىن ەكى ءتىس جيىنتىعى بار ەكەندىگىن بۇرىننان بىلەدى. الايدا سوڭعى زەرتتەۋلەر ءبىزدىڭ قىزىل يەكتىڭ استىندا جاسىرىنعان ءۇشىنشى ۇرپاقتىڭ بۇرشىكتەرى دە بار ەكەنىن كورسەتكەن. ءدال وسى جاسىرىن بۇرشىكتەردى ىنتالاندىرىپ، ولارعا اسەر ەتۋ ارقىلى ءتۇسىپ قالعان تىستەردى تولىق قايتا ءوسىرۋ ءۇشىن جاڭا پرەپارات جاسالدى. وسى ۋاقىتقا دەيىن پرەپارات تىشقاندار مەن كۇزەندەردە سىنالىپ، وتە پەرسپەكتيۆالى ناتيجە كورسەتتى.
ادەتتە ءتىس USAG-1 اقۋىزىنىڭ بەلسەندىلىگىنەن وسپەي قالادى. ال جاڭا پرەپارات ءۇشىنشى تىستەر جيناعىن وياتۋعا مۇمكىندىك بەرۋ ءۇشىن USAG-1 اقۋىزىن بلوكتاپ، تىستەردى قالپىنا كەلتىرۋ اسەرىن تۋدىرادى.
پرەپارات دۇنيەجۇزىندەگى ادامداردىڭ شامامەن 0,1 پايىزىنا اسەر ەتەتىن تۇقىم قۋالايتىن اۋرۋعا قارسى جاسالعان. بۇنداي اۋرۋ شايناۋ پروبلەمالارىن تۋدىرادى، ال جاپونيادا ونداي كەمشىلىكتەرى بار ادامداردىڭ كوپشىلىگى جاستىق شاعىندا اۋزىن ماسكامەن بۇركەپ وتكىزەدى.
ءتىستى قالپىنا كەلتىرۋگە ارنالعان وسى پرەپاراتتى قىزىل يەكتىڭ استىندا جاسىرىلعان ءۇشىنشى تىستەر جيناعىن بەلسەندىرۋ ءۇشىن قولدانۋ ءتىس دارىگەرلەرىنە جەتىسپەيتىن تىستەردى ساۋ، تابيعي جولمەن ءوسىرىپ الۋعا مۇمكىندىك بەرەدى. بۇل ستوماتولوگتار ءۇشىن ۇلكەن وزگەرىستەردىڭ باسى عانا. كلينيكالىق سىناقتاردىڭ العاشقى كەزەڭى ءساتتى بولعانىمەن، بۇل پرەپاراتتىڭ ادامداردا قانشالىقتى جاقسى جۇمىس ىستەيتىنىن باقىلاۋ كەرەك. عالىمدار الداعى ايلاردا پرەپارات جۇمىس ىستەي باستاعاندا جاقسى ناتيجەلەر بولادى دەپ ۇمىتتەنەدى.
باقىتىمىزعا وراي، دارىگەرلەر جاڭا ءدارىنى اۋىز قۋىسىنىڭ قاي جەرىنە ەنگىزۋ كەرەكتىگىن انىقتاپ، جاڭا ءتىستىڭ قاي جەردە وسەتىنىن باقىلاي الادى. ءبىراق بۇل سىناق ءدارىنىڭ تىستەردى قالپىنا كەلتىرە الاتىندىعىن تەكسەرۋ ءۇشىن جۇرگىزىلمەيدى. ويتكەنى ماماندار ءدارىنىڭ تيىمدىلىگىنە تولىق كەپىلدىك بەرەدى. سىناقتار جاڭا پرەپاراتتىڭ ادام اعزاسىنا قانشالىقتى قاۋىپسىز ەكەنىن تەكسەرۋ ءۇشىن عانا قاجەت.
سىناقتار ءساتتى وتسە، تىستەردى قالپىنا كەلتىرۋگە ارنالعان جاڭا ءدارى جاپپاي قولدانىسقا ەنگىزىلىپ، ءتىس ەمدەۋ پروبلەماسىن شەشۋ جولىن تۇبەگەيلى وزگەرتۋى مۇمكىن.
سىناقتار قازاننان كەلەسى جىلدىڭ كۇزىنە دەيىن جالعاسادى دەپ جوسپارلانعان. سىناقتار ءۇشىن 30-64 جاس ارالىعىنداعى 30 ەر ادام ىرىكتەلىپ، ولارعا كوكتامىرعا ءدارى ەنگىزىلەدى. ولاردىڭ دەنساۋلىق جاعدايى مەن جاناما اسەرلەرى ۇنەمى باقىلاۋدا بولادى. ستارتاپ بارلىق جاناما اسەرلەردى مۇقيات جازىپ الادى، ءبىراق زەرتتەۋشىلەر ەشقانداي ەرەكشە پروبلەمالاردىڭ بولمايتىنىنا سەنىمدى. بۇرىن سىنالعان جانۋارلاردا تەرىس رەاكسيالار مۇلدەم تىركەلمەگەن.
ەر ادامداردىڭ سىناعى ءساتتى بولسا، كەلەسى كەزەڭدە سىناقتار 2-7 جاس ارالىعىنداعى بالالاردا جالعاسادى. بۇل جەردە ءتورت نەمەسە ودان دا كوپ تىستەرى وسپەي قالعان بالالار تاڭدالماقشى.
پرەپاراتتى 2030 -جىلى ساتىلىمعا شىعارۋ جوسپارلانعان. ول الدىمەن تىستەرى مۇلدەم وسپەگەندەرگە ۇسىنىلادى. ءدارىنىڭ ساۋدالىق اتاۋى، باعاسى تۋرالى ايتۋ ءالى ەرتە. ءبىراق ستارتاپ وكىلدەرىنىڭ مالىمدەمەلەرىنە سايكەس، پرەپارات ارزان بولمايدى.
مامانداردىڭ ايتۋىنشا، 2030 -جىلعا قاراي كاريەستىڭ سالدارىنان تىستەرىن جوعالتقاندار ءۇشىن دە بۇل پرەپاراتتى قولدانۋ مۇمكىن. ونداي ادامداردىڭ سانى جۇزدەگەن ميلليون بولۋى مۇمكىن. ستارتاپ وكىلدەرى بۇنداي ادامدارعا دا جاڭا پرەپارات كومەكتەسەتىنىنە سەنىمدى.
