ءسىزدى تەرگەۋ ورگاندارىنا جاۋاپ الۋعا شاقىرسا، نەنى ءبىلۋىڭىز كەرەك؟
كەز كەلگەن ازامات تەرگەۋ ورگاندارىنا كۇدىكتى، ايىپتالۋشى، كۋاگەر نەمەسە جابىرلەنۋشى رەتىندە شاقىرىلۋى مۇمكىن.
ادامدار ۋاكىلەتتى ادامداردىڭ، تەرگەۋ ورگاندارىنىڭ جاۋاپ الۋعا شاقىرۋىن كورگەندە ىڭعايسىزدىق جانە قورقىنىشتى سەزەدى.
Massaget.kz ءتىلشىسى مۇنداي قيىن جاعدايدا ءوزىن قالاي ۇستاۋ كەرەگىن انىقتاپ كوردى.
ەگەر ءسىز وسىنداي جاعدايعا ءبىرىنشى رەت تاپ بولساڭىز، كەڭەس نەمەسە جاۋاپ الۋ كەزىندە سۇيەمەلدەۋ بويىنشا كومەك الۋ ءۇشىن ادۆوكات كومەگىنە جۇگىنگەنىڭىز ابزال.
ق ر قىلمىستىق كودەكسىنىڭ 208-بابى 1-بولىگىنە سايكەس، سوتالدى تەرگەۋدى جۇزەگە اسىراتىن ادام كۋاگەر، جابىرلەنۋشى، كۇدىكتىنى جاۋاپ الۋعا شاقىرۋ قاعازى ارقىلى شاقىرۋى كەرەك. شاقىرۋ قاعازىندا:
جاۋاپ الۋعا شاقىرىلعان ادامنىڭ تەگى، اتى، اكەسىنىڭ اتى؛
شاقىرعان ادامنىڭ تەگى، اتى، اكەسىنىڭ اتى، لاۋازىمى؛
جاۋاپ الۋعا كەلۋ مەكەنجايى مەن ۋاقىتى؛
ادۆوكاتتى شاقىرۋ قۇقىعى؛
سونداي-اق، سالماقتى سەبەپسىز جاۋاپ الۋعا كەلمەۋ سالدارى كورسەتىلەدى.
شاقىرۋ قاعازى جاۋاپ الۋعا شاقىرىلعان ادامعا قولحات نە بايلانىس قۇرالدارىنىڭ كومەگىمەن بەرىلەدى. ەگەر شاقىرۋ قاعازىن كۋرەر، باسقا جاۋاپتى تۇلعا نەمەسە پوليتسيا قىزمەتكەرى قول قويعىزىپ، سونداي-اق جاۋاپ الۋعا شاقىراتىن ۋاكىلەتتى تۇلعاعا تيەسىلى بايلانىس كوزىمەن رەسمي تۇردە بەلگىلى بايلانىس قۇرالى ارقىلى جەكە تابىستاسا، وندا ءسىز ۋاكىلەتتى ورگانعا كەلۋگە مىندەتتىسىز.
ق ر قىلمىستىق-پروتسەستىك كودەكسى 78-بابى 3 جانە 6-بولىكتەرىنە سايكەس، كۋاگەردىڭ:
وزىنە، جۇبايىنا نەمەسە جاقىن تۋىستارىنا قىلمىستىق جازالاناتىن ءىس-ارەكەت نەمەسە اكىمشىلىك قۇقىقبۇزۋشىلىق جاساعانى ءۇشىن قۋدالاۋعا اكەپ سوعۋى مۇمكىن ايعاقتار بەرۋدەن باس تارتۋعا؛
ءوزىنىڭ انا تىلىندە نەمەسە ءوزى بىلەتىن تىلدە ايعاقتار بەرۋگە؛
اۋدارماشىنىڭ تەگىن كومەگىن پايدالانۋعا؛
وزىنەن جاۋاپ الۋعا قاتىساتىن اۋدارماشىعا قارسىلىق ءبىلدىرۋدى مالىمدەۋگە؛
جاۋاپ الۋ حاتتاماسىنا ايعاقتاردى ءوز قولىمەن جازۋعا؛
ودان جاۋاپ الۋعا قاتىساتىن اۋدارماشىعا قارسىلىق بىلدىرۋگە ءوتىنىش جاساۋعا؛
انىقتاۋشىنىڭ، تەرگەۋشىنىڭ، پروكۋروردىڭ جانە سوتتىڭ ارەكەتتەرىنە (ارەكەتسىزدىگىنە) شاعىم كەلتىرۋگە، ءوزىنىڭ قۇقىقتارى مەن زاڭدى مۇددەلەرىنە قاتىستى، ونىڭ ىشىندە قاۋىپسىزدىك شارالارىن قولدانۋ تۋرالى ءوتىنىشحاتتار مالىمدەۋگە قۇقىعى بار.
سونىمەن قاتار، ادۆوكات اسەل بيكەنوۆا جاۋاپ الۋعا شاقىرىلعان ادامدارعا كەڭەس بەردى.
ەشقاشان تەگىن ادۆوكاتقا كەلىسپەڭىز؛
بارلىق ەسكەرتۋى حاتتاماعا جازىپ وتىرىڭىز؛
حاتتامادا بوس ورىن قالسا، بارلىق جەردە سىزىقشا قويىڭىز؛
«مەن بىلمەيمىن» ەمەس، «ەسىمدە جوق»، دەپ ايتىڭىز؛
«سەبەبى، ەگەر «ەسىمدە جوق» دەپ ايتساڭىز، ول ەسىڭىزگە ءتۇسۋى مۇمكىن ەكەنىن بىلدىرەدى. ال «بىلمەيمىن» دەپ ايتساڭىز، بۇل جالعان كورسەتكىش بولىپ سانالادى»، - دەيدى ادۆوكات.
اسەل بيكەنوۆا سوڭعى كەزدە مەملەكەت تاعايىنداعان تەگىن ادۆوكات قىلمىستىق پروتسەستىڭ ۇلكەن ماسەلەسى ەكەنىن ايتتى.
«مەملەكەت تاعايىنداعان كوپتەگەن ادۆوكات ءىس بويىنشا ساپالى جۇمىس ىستەۋگە ىنتالى ەمەس. سەبەبى ولاردىڭ جالاقىسى وزدەرىنىڭ جەكە قورعالۋشى تولەيتىن سومادان بىرنەشە ەسە تومەن. سوندىقتان ولار كوبىرەك ءوتىنىش قابىلداۋ ءۇشىن، جۇمىس ساپاسىنا ەمەس سانىنا قاراۋعا ءماجبۇر.
قالاي ويلايسىز، ەگەر ادۆوكات ءبىر كۇندە 10 تومنان تۇراتىن قىلمىستىق ءىستى قاراعانى تۋرالى قۇجاتقا قول قويسا، بۇل ونىڭ ىسپەن شىن مانىندە تانىسقانىن بىلدىرەدى مە؟
قۇجات بويىنشا - ءيا، تانىستى. ال شىن مانىندە؟ ارينە، جوق. ويتكەنى مۇنداي ماتەريالمەن تولىق ءارى مۇقيات تانىسۋ ءۇشىن كەم دەگەندە 3-4 كۇن قاجەت.
سالدارىنان، مەملەكەت تاعايىنداعان تەگىن ادۆوكاتتار كوبىنەسە ءىستىڭ ءمانىن زەرتتەمەيدى، بۇل كوبىنەسە قورعاۋشىنىڭ جاساعان نە جاساماعان ءىسىن ءوز جاۋاپكەرشىلىگىنە الىپ، كىنانى مويىنداۋىنا باعىتتالعان قۇقىقتىق پوزيتسيانى تاڭداۋعا اكەلەدى»، - دەيدى اسەل بيكەنوۆا.
