ءسىز كولىكتى دۇرىس قىزدىرىپ ءجۇرسىز بە؟ اۆتوساراپشى جاۋاپ بەردى
استانا. قازاقپارات - سۋىق ماۋسىمنىڭ باستالۋىمەن جۇرگىزۋشىلەر قوزعالىس الدىندا قوزعالتقىشتى دۇرىس جىلىتۋ ماسەلەسىنە تاپ بولادى. قىستا كولىكتى جىلىتۋدىڭ دۇرىس الگوريتمىن اۆتوساراپشى اتاپ ءوتتى.
قازىرگى زامانعى اۆتوموبيلدەر بۇرىنعىداي ۇزاق قىزدىرۋدى قاجەت ەتپەيتىنىن ءبارى بىلەدى. ويتكەنى جاڭا زامانعى كولىكتەر ولاردى تەز جۇمىس جاعدايىنا كەلتىرەتىن ەلەكتروندى جۇيەلەرمەن جابدىقتالعان.
«ورنىندا تۇرعان كولىكتى ۇزاق قىزدىرۋ وتىن شىعىنىن ارتتىرىپ قانا قويمايدى، سونىمەن قاتار جانارمايدىڭ تولىق جانباۋىنا بايلانىستى كۇيەنىڭ پايدا بولۋىنا اكەلۋى مۇمكىن»، - دەيدى اۆتوساراپشى يۋري رەزنيەۆ.
ساراپشى كولىكتى ءبىر-ەكى مينۋتقا عانا قىزدىرىپ بىركەلكى قوزعالىستان باستاۋدى ۇسىنادى جانە قوزعالتقىشقا كۇش تۇسىرۋدەن اۋلاق بولۋعا شاقىرادى. بۇل قوزعالتقىشتىڭ جۇمىس تەمپەراتۋراسىنا باپپەن جەتۋىنە جانە بولشەكتەرگە تۇسەتىن كۇشتى ازايتۋعا مۇمكىندىك بەرەدى.
دۇرىس الگوريتمنەن باسقا، جوعارى ساپالى مايدى پايدالانۋ ماڭىزدى.
«قازىرگى زامانعى موتور مايلارى قاتتى ايازدا دا قوزعالتقىش بولشەكتەرىن جەتكىلىكتى دەڭگەيدە مايلاۋدى قامتاماسىز ەتەدى، بۇل اۆتوموبيلدى ۇزاق قىزدىرماي-اق ىسكە قوسۋعا مۇمكىندىك بەرەدى. بۇل مايلار ايازعا ءتوزىمدى عانا ەمەس، سونىمەن قاتار جوعارعى تەمپەراتۋراعا دا ءتوزىمدى»، - دەپ قورىتىندىلادى ساراپشى.
