س ءى م قازاقستاندىقتارعا قاي ەلدە جۇرسە دە ساق بولۋدى ەسكەرتتى
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستاندىقتارعا قاي ەلدە جۇرسە دە ساق بولۋدى ەسكەرتتى.
«ارينە، تەراكت (ماسكەۋدەگى Crocus City Hall» كونتسەرت زالىندا ورىن العان تەراكت) ادام شوشىتارلىق بولدى. سول ءتۇنى قازاقستاننىڭ رەسەيدەگى ەلشىلىگىمەن حابارلاسىپ، بەكىتىلگەن الگوريتم بويىنشا جۇمىس ىستەدىك. جەدەل جەلىنىڭ تەلەفون ءنومىرى جاريالاندى. ماسكەۋدەگى ستۋدەنتتەر مەن باسقا دا قازاقستان ازاماتتارىنىڭ بارىمەن حابارلاسىپ، جاعدايىن انىقتاي باستادىق. قازىرگى تاڭدا قازا تاپقاندار مەن زارداپ شەككەندەردىڭ اراسىندا قازاقستان ازاماتى جوق»، - دەدى رەسمي وكىل.
ونىڭ اتاپ وتۋىنشە، بۇگىندە الەمدەگى جاعداي كۇردەلىنىپ بارا جاتىر. ودان ەشكىم ساقتانباعان. سوندىقتان ازاماتتارىمىز قاي ەلدە جۇرسە دە سول ەلدىڭ بيلىگى قويعان زاڭدى تالاپتاردى ورىنداۋى كەرەك.
«ساقتىقتا قورلىق جوق. ساق بولىپ جۇرگەن دۇرىس دەپ ويلايمىن. قازىر رەسەيدە ناقتى قانشا ستۋدەنت وقيتىنىن بىلمەيمىز. ويتكەنى، ءار ادام قايدا وقيتىنىن ءوزى شەشەدى. بەيرەسمي دەرەكتەر بويىنشا 40 مىڭعا جۋىق قازاقستاندىق ستۋدەنت رەسەيدە وقىپ ءجۇر. ولار ودان دا كوپ بولۋى مۇمكىن»، - دەدى ايبەك سمادياروۆ.
