ا ق ش- تا COVID-19 عا قارسى پرەپارات ماقۇلداندى
ول قاتتى اۋىرۋ قاۋپى بار 12 جاستان اسقان ادامدارعا ارنالعان. ونى ءۇي جاعدايىندا ەم قابىلداۋ كەزىندە قولدانۋعا بولادى. بۇل، سونىمەن قاتار، تەز تارالىپ جاتقان «وميكرون» شتامىنا قارسى جاڭا قۇرال رەتىندە ۇسىنىلدى، دەپ حابارلايدى قازاقپارات Reuters-كە سىلتەمە جاساپ.
Pfizer كومپانياسىنىڭ كلينيكالىق زەرتتەۋىنىڭ دەرەكتەرىنە ساي، Paxlovid انتيۆيرۋستىق پرەپاراتى %90 تيىمدىلىگىن كورسەتكەن. سوڭعى زەرتحانالىق دەرەكتەر بويىنشا، پرەپارات «وميكرون» شتامىمەن كۇرەسۋگە دە جارامدى.
«پرەپاراتتىڭ ماقۇلدانۋى - ماڭىزدى قادام، ول COVID-19 ينفەكتسياسىن باسقارۋعا كومەكتەسەدى»، دەدى دجونس حوپكينس دەنساۋلىق ساقتاۋ ينستيتۋتىنىڭ اعا عىلىمي قىزمەتكەرى امەش اداليا.
«الايدا بۇل ورايدا ەكى ماسەلە تۋىندايدى: الداعى اپتالاردا پرەپارات از بولادى، ونى ءتيىمدى قولدانۋ تەز دياگنوستيكانى تالاپ ەتەدى، ال بۇل كوروناۆيرۋسقا تەست تاپسىرۋداعى تۇراقتى پروبلەمالاردىڭ سالدارىنان قيىنعا سوعادى».
Pfizer كومپانياسىنىڭ حابارلاۋىنشا، 180000 ەم كۋرسىنا ارنالعان پرەپارات وسى جىلى جىبەرۋگە دايىن تۇر. كومپانيا مەن ا ق ش ۇكىمەتى وتىرعان كەلىسىم- شارت بويىنشا، ءار كۋرس 530 دوللارعا باعالانىپ وتىر. ۇكىمەت 10 ميلليون ەم كۋرسىنا ارنالعان پرەپارات سۇراتقان.
پرەپارات تەك رەتسەپتپەن بەرىلەدى. ءدارىنى قابىلداۋ كوروناۆيرۋس سيمپتومدارى بايقالعان كەزدەن باستاپ بەس كۇنى بويى ءار 12 ساعات سايىن قابىلداپ وتىرۋ كەرەك.
