COVID-19: قازاقستان «جاسىل» ايماقتا
«قىزىل» نەمەسە قاۋىپتى اۋماقتا ەكى ءوڭىر بار. ولار - سولتۇستىك قازاقستان جانە پاۆلودار وبلىستارى.
بۇل تۋرالى ق ر دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتارلىق دارىگەر ەرلان قياسوۆ و ك ق بريفينگىندە مالىمدەدى.
«الدىڭعى اپتامەن سالىستىرعاندا «قىزىل» ايماقتان «سارى» ايماققا قوستاناي جانە اقمولا وبلىستارى اۋىستى.
«سارى» ايماقتا الماتى، نۇر-سۇلتان قالالارى، ش ق و جانە اتىراۋ وبلىستارى تۇر. «سارى» ايماقتان «جاسىل» ايماققا ب ق و اۋىستى. قالعان وڭىرلەر «جاسىل» ايماقتا. وتكەن ەكى اپتا ىشىندە كوروناۆيرۋسپەن اۋىرعاندار سانى 10 پروتسەنت ءوستى»، - دەدى.
ەلىمىزدە وتكەن تاۋلىكتە كوروناۆيرۋس ينفەكتسياسىن جۇقتىرعان 777 جاعداي تىركەلدى. پاۆلودار وبلىسىنىڭ اقسۋ قالاسىنداعى قارتتار ۇيىندە 65 ادامنان كوروناۆيرۋس ىندەتى انىقتالدى. اۋرۋى راستالعان 33 جان سونداعى جۇقپالى اۋرۋلار اۋرۋحاسىنا جاتقىزىلعان. قالعان 27 ادام دارىگەرلەردىڭ باقىلاۋىندا. ءبىر ناۋقاستىڭ جاعدايى اۋىر. بۇعان قوسا قارتتار ءۇيىنىڭ 11 قىزمەتكەرى ىندەت جۇقتىرعانى بەلگىلى بولدى.
جالپى قارتتار ۇيىندە 150 ادام تۇرادى. ولاردىڭ بارىنەن پ ت ر سىناما الىنعان. بۇل جاعداي وبلىستىق دەنساۋلىق ساقتاۋ باسقارماسىنىڭ ەرەكشە باقىلاۋىندا. قاريالاردىڭ جاپپاي ىندەت جۇقتىرۋىنا ناقتى قانداي سەبەپ بولعانىن ءدوپ باسىپ ەشكىم ايتا المايدى.
جالپى وبلىس بويىنشا كوروناۆيرۋسقا شالدىققاندار سانى 7 مىڭ 212 ادامعا جەتتى. ناۋرىز ايىنان بەرى ەسەپتەگەندە ۆيرۋستىق ينفەكتسيادان 62 ادام كوز جۇمدى. سونىمەن قاتار، پاۆلودار وبلىسىندا قوعامدىق كولىكتەردە سانيتارلىق تالاپتار كۇشەيەدى.
سەبەبى جولاۋشىعا لىق تولى اۆتوبۋستار سانى ءالى دە بارشىلىق. ال بۇل كوۆيد جۇقتىرۋ بويىنشا قىزىل ايماققا كىرىپ وتىرعان وڭىردەگى جاعدايدى ودان ءارى ۋشىقتىرارى انىق. سوندىقتان مونيتورينگتىك توپ وكىلدەرى جولاۋشى تاسىمالىمەن اينالىساتىن كولىك يەلەرى اراسىندا ءتۇسىندىرۋ جۇمىستارى مەن تەكسەرىستى قاتاڭ قولعا الدى.
الماتىنىڭ ءدارى-دارمەك قورىندا 8 ميلليون ءدارى بار. بۇل 68 اتاۋ بويىنشا جانە جەكە قورعانۋ قۇرالدارىنىڭ ەكى ايعا جەتەتىن مولشەرى بار. بۇل تۋرالى الماتى قالاسىنىڭ اكىمى باقىتجان ساعىنتايەۆ ايتتى.
ونىڭ ايتۋىنشا، بۇل ماقساتقا 10 ميلليارد تەڭگە ءبولىندى: ەمحانالار مەن ءدارىحانالاردى ءدارى- دارمەكپەن قامتاماسىز ەتۋگە شامامەن 5 ميلليارد تەڭگە بولىنەدى. سونداي-اق باقىتجان ساعىنتايەۆ قالادا شەكتەۋ شارالارىن كۇشەيتە الاتىن جاعدايلاردى اتاپ ءوتتى. بۇل كوروناۆيرۋس جۇقتىرىپ، اۋرۋحاناعا جاتقىزىلعانداردىڭ كورسەتكىشىنە بايلانىستى دەدى.
مەگاپوليستە پاندەميانىڭ جاڭا تولقىنىنا 7000 توسەكتەن اساتىن 23 ستاتسيونار دايىندالدى. ونىڭ ىشىندە 250 ءى رەانيماتسيالىق. كلينيكالاردىڭ ماتەريالدىق-تەحنيكالىق بازاسىن نىعايتۋ ءۇشىن بيىل 4 مىڭنان استام جابدىق ساتىپ الىندى. ونىڭ ىشىندە 236 وكپەنى جاساندى جەلدەتۋ اپپاراتتارى بار. الماتىدا جاڭاجىلدىق ساۋىق كەشتەرى مەن توي-دۋمانعا رۇقسات جوق. كۇز ايلارىنان بەرى قاۋىپتى دەرتكە 1600 دەن استام ادام شالدىققان.
«سىرقات تانۋشىلار اراسىندا 20-40 جاس ارالىعىنداعى تۇرعىندار دا ءجيى كەزدەسەدى»، - دەدى قالانىڭ باس سانيتارلىق دارىگەرى جانداربەك بەكشين.
كارانتين ءتارتىبىن قاتاڭداتۋ ماقساتىندا ءبىرشاما شارالار قولعا الىنعان. ءىرى ساۋدا-ساتتىق ورىندارى سەنبى كۇنى تەك كەشكى ساعات 17:00 گە دەيىن اشىق. ال، جەكسەنبىدە جابىق بولادى. دەگەنمەن، مەرەكە قارساڭىندا ساۋدا ورتالىقتارى مەن گيپەرماركەتتەردىڭ تاۋلىك بويى جۇمىس ىستەۋ ماسەلەسى قاراستىرىلىپ جاتىر.
جالپى قالادا كارانتيندىك شەكتەۋدى ەلەمەگەندەرگە 780 اكىمشىلىك قۇقىق بۇزۋشىلىق تۋرالى حاتتاما تولتىرىلىپ، 13 ءىس سوتقا جولدانعان. وتكەن جەكسەنبىدە ەل اۋماعىنا 22 حالىقارالىق رەيسپەن 2860 ادام ۇشىپ كەلدى. ولاردىڭ 532 ءىنىڭ قولىندا پ ت ر انىقتاما بولماي شىقتى.
اتاپ ايتساق، نۇر-سۇلتان اۋەجايىندا 271، الماتىدا 200، ورالدا 61 جولاۋشى انىقتالىپ، تەسكەرىستەن ءوتۋى ءۇشىن كارانتيندىك ستاتسيونارعا جاتقىزىلدى.
دەگەنمەن، بۇل ازاماتتار جاساتقان تەست ەشقانداي ينفەكتسيا بەلگىلەرى جوق ەكەنىن كورسەتتى، دەپ حابارلايدى سانيتارلىق-ەپيدەميولوگيالىق باقىلاۋ كوميتەتى.
قوستاناي، رۋدنىي جانە ءجىتىقارا قالالارىندا سانيتارلىق بەكەتتەر الىندى. ءبىراق كورشى وبلىستار مەن رەسەي ەلىمەن شەكاراداعى شەكتەۋلەر ساقتالا بەرەدى. باس سانيتار دارىگەردىڭ قاۋلىسىمەن ايماقتا كارانتين شارالارى جەڭىلدەدى. بۇدان بىلاي قوعامدىق تاماقتانۋ نىساندارىنىڭ جۇمىسى ساعات كەشكى 23:00 گە دەيىن ۇزارتىلادى.
قالالىق اۆتوبۋستار مەن تاكسي وسى ۋاقىتقا دەيىن قاتىناي الادى. فيتنەس، اكۆا، تەرموپارك، شيپاجايلار مەن دەمالىس ورىندارى 30 پروتسەنتتىك مەجەمەن جۇمىس ىستەيدى. دەگەنمەن بۇلاردىڭ ءبارى دەمالىس جانە مەرەكە كۇندەرى قىزمەت كورسەتە المايدى.
تۇرعىندارعا كەشكى ساعات 23:00 دەن تاڭعى 6:00 گە دەيىن كوشەگە شىعۋعا ءالى دە تىيىم سالىنعان. مۇنداي شەكتەۋ 14- جەلتوقسانعا دەيىن ساقتالادى. قاراعاندى وبلىسىنداعى ءىرى ساۋدا ورىندارى دەمالىس جانە مەرەكە كۇندەرى دە اشىق بولادى. تەك كاسىپكەرلەر بارلىق سانيتارلىق تالاپتى ساقتاي وتىرىپ، كەشكى ساعات 17:00 گە دەيىن جۇمىس ىستەي الادى.
بۇل شەكتەۋدىڭ ازىق-تۇلىك دۇكەندەرى مەن ءدارىحانالارعا قاتىسى جوق. ال بالالاردىڭ ويىن ورتالىقتارى ءالى دە جابىق. وبلىستىڭ باس سانيتار دارىگەرىنىڭ جاڭا قاۋلىسى جەكسەنبىدەن باستاپ كۇشىنە ەنەدى. ايتا كەتۋ كەرەك، قازىر قاراعاندى وبلىسىندا ەپيدەميولوگيالىق احۋال تۇراقتى.
اقتوبە وبلىسىنداعى ساۋدا ورىندارى دا جەكسەنبى كۇنى جۇمىس ىستەيدى. باس سانيتارلىق دارىگەردىڭ قاۋلىسى الداعى جۇمادان باستاپ كۇشىنە ەنەدى. سونداي-اق جانارماي بەكەتتەرى، تەحنيكالىق قىزمەت كورسەتۋ ورتالىقتارى، اياق-كيىم، تىگىن شەبەرحانالارى مەن حيميالىق تازالاۋ قىزمەتى دە وزدەرىنىڭ ىشكى تارتىپتەرىنە سايكەس جۇمىس ىستەي الادى.
تاماق جەتكىزۋمەن اينالىساتىن فۋدكورتتاردىڭ قىزمەتىنە دە رۇقسات. ال، مەكتەپكە دەيىنگى ۇيىمدار كەزەكشى توپتارعا 20 بالاعا دەيىن قابىلداي بەرەدى. دەگەنمەن، جاڭا جىلعا وراي كوپشىلىككە ارنالعان ءىس-شارالار، بالاباقشالاردا كەشتەر وتكىزۋگە بولمايدى.
