الەم ەلدەرىنىڭ اسكەرى COVID-19 ىندەتىمەن قالاي كۇرەسىپ جاتىر
قازىرگى تاڭدا كوپتەگەن ەلدىڭ اسكەريلەرى ينفەكسياعا قارسى كۇرەستە ماڭىزدى رولگە يە. وتان قورعاۋشىلار كۇنى قارساڭىندا قازاقپارات ءتىلشىسى الەم ەلدەرىنىڭ اسكەرى COVID-19 ىندەتىمەن قالاي كۇرەسىپ جاتقانىن تالداپ كوردى.
دۇنيە جۇزىندە اسكەري كۇشتەردىڭ ءبارى دە مەديتسينا قىزمەتكەرلەرىمەن بىرگە جۇمىلىپ، قۇرلىقتاعى كۇشتەر قوعامداعى زاڭدىلىق پەن ءتارتىپتى قورعاپ، جەرگىلىكتى بيلىك ورگاندارىنا كومەك كورسەتىپ، كوشەدە دەزينفەكسيا جۇرگىزەدى. اۋە كۇشتەرى ازاماتتاردى ۇيلەرىنە جەتكىزىپ، گۋمانيتارلىق جۇك جەتكىزەدى. قازاقستاندا دا قارۋلى كۇشتەر كوروناۆيرۋسقا قارسى كۇرەستىڭ الدىڭعى قاتارىندا.
اسكەريلەر كارانتيندىك شارالارعا كەڭىنەن اتسالىسىپ، كوشەلەرگە پاترۋل جاسايدى، بيولوگيالىق قاۋىپسىزدىك بولىمشەلەرى دەزينفەكسيا جۇرگىزەدى. اسكەري- كولىك اۆياتسياسىنىڭ كۇشتەرىمەن ءبىزدىڭ وتانداستارىمىز ءوز وتانىنا قايتارىلىپ جاتىر. كارى قۇرلىقتا كوروناۆيرۋس ىندەتى ەۋروپالىقتاردىڭ قاۋىپتى اۋرۋعا مۇلدە دايىن ەمەستىگىن كورسەتىپ بەردى. وسىناۋ قيىن ۋاقىتتا اسكەريلەر سانيتارلىق تازارتقىشتار مەن قوراپتارمەن قارۋلانىپ، ينفەكسياعا قارسى ىمىراسىز كۇرەس جۇرگىزۋدە.
ەۋروپادا ۆيرۋستان قاتتى زارداپ شەككەن يتاليادا ارميا ناۋرىز ايىنىڭ ورتاسىندا جالپى ۇلتتىق كارانتيندى قولداۋعا جۇمىلدىرىلدى.
اسكەري دارىگەرلەر بىرنەشە دالالىق اۋرۋحانانى جاساقتاسا، يتاليا اسكەري- اۋە كۇشتەرى شەتەلدەن ءدارى- دارمەكتەر مەن قۇرال- جابدىقتاردى جەتكىزىپ، سىرتتا قالعان ازاماتتارىن ەلگە قايتارۋدا. كوروناۆيرۋس انىقتالعان ادام سانى بويىنشا اقش- تان كەيىن الەمدە ەكىنشى ورىندا تۇرعان يسپانيا 60 مىڭعا جۋىق اسكەري قىزمەتكەردى دەزينفەكسيالاۋعا جانە كوشەلەردى پاترۋلدەۋگە جۇمىلدىرعان. قارۋلى كۇشتەر مۇقتاجداردىڭ بارىنە ازىق-تۇلىك پەن نەگىزگى قاجەتتى زاتتاردى تاراتىپ ءجۇر. ارميا ⅩⅨ عاسىردىڭ باسىندا وڭتۇستىك امەريكاداعى يسپاندىق كولونيالارداعى شەشەكپەن كۇرەسۋ ەكسپەديتسياسىن باسقارعان يسپان دارىگەرى فرانسيسكو حاۆەر دە بالميستىڭ ەسىمىمەن اتالاتىن «بالميس» وپەراتسياسى اياسىندا مىندەتىن اتقارىپ كەلەدى.
گەرمانيا ۇكىمەتى ءوز كەزەگىندە ايماقتىق بيلىك ورگاندارىنىڭ كوروناۆيرۋسقا قارسى كۇرەسىنە كومەك كورسەتۋ ءۇشىن شامامەن 15 مىڭ ساربازدى جۇمىلدىردى. اسكەريلەر مەديتسينالىق تەحنيكانى تاراتۋمەن جانە ۋاقىتشا اۋرۋحانالاردى ورنالاستىرۋمەن اينالىسادى.
گەرمانيا ەۋروپاداعى باسقا ەلدەرگە قاراعاندا ەپيدەميامەن ءتيىمدى كۇرەس جۇرگىزىپ جاتىر.
بۇل ەل بۇكىل ەۋروپادان اۋىر ناۋقاستاردى قابىلداۋعا قاۋقارلى. ارنايى جابدىقتالعان بۋندەسۆەر اۋە كۇشتەرى مۇنداي ناۋقاستاردى گەرمانيا اۋرۋحانالارىندا ەمدەۋ ءۇشىن تاسىمالدايدى. اسكەري دارىگەرلەر فرانسيادا دا ازاماتتىق ارىپتەستەرىمەن بىرگە يىق تىرەسە ۆيرۋسپەن كۇرەسۋدە. ونداعى اسكەري- تەڭىز كۇشتەرى فرانسيانىڭ شەتەلدەردەگى دەنساۋلىق ساقتاۋ ميسسيالارىنا قاتىسادى.
ال قىتاي حالىق ازاتتىق ارمياسى پاتسيەنتتەردى ەمدەۋدەن، دەزينفەكسيا جانە كوشەلەردى پاترۋلدەۋمەن قاتار حالىققا ءدارى- دارمەكتەر مەن قاجەتتى زاتتاردى جەتكىزۋدى دە ءوز موينىنا العان.
پاندەميا ارميانىڭ تەك دەنساۋلىق ساقتاۋ جانە قۇقىق قورعاۋ سالاسىندا عانا ەمەس، الەۋمەتتىك قامسىزداندىرۋ سالاسىنداعى ازاماتتىق كۇشتەردى دە تولىقتىرا الاتىنىنن كورسەتتى. الەمدى شەڭگەلىنە العان كەسەل وسىناۋ قاتال سالاداعى ادامداردىڭ ادامي سيپاتىن كورسەتىپ وتىر.
بەلگيادا اسكەري قىزمەتكەرلەر قارتتار ۇيىنە كومەك كورسەتەدى. ال پولياك اسكەريلەرى كارانتينگە جاتقىزىلعان ادامدار مەن كوروناۆيرۋسپەن اۋىراتىن ناۋقاستارعا پسيحولوگيالىق قولداۋ كورسەتۋ ءۇشىن تاۋلىك بويى جۇمىس ىستەيتىن ارنايى تەلەفون جەلىسىن اشقان.
مەكسيكادا ۆيرۋسقا قاتىستى كۇردەلى جاعداي قالىپتاسقان. وسىعان بايلانىستى اسكەري ادامدار ازاماتتىق اۋرۋحانالاردى باسقارۋدى ءوز موينىنا الدى. ال يتاليادا اسكەري قىزمەتكەرلەر مارقۇمداردىڭ مايىتتەرىن زيراتتارعا اپارىپ، كومەدى.
رەسەي ارمياسى كوپ فۋنكسيالى مەديتسينالىق ورتالىقتار سالىپ، يتالياعا پاندەميامەن كۇرەسۋگە كومەكتەسۋدە. ال ا ق ش قارۋلى كۇشتەرى بايلانىس ورتالىقتارىنا قولداۋ كورسەتىپ، ازاماتتاردىڭ سۇراقتارىنا جاۋاپ بەرىپ جاتىر.
ا ق ش ارمياسىنىڭ ينجەنەرلەرى اۋرۋحانا سالا باستادى. ال ا ق ش ۇلتتىق گۆاردياسى قوعامدىق ورىنداردى تازارتىپ، قوعامنىڭ ەڭ ءالسىز توپتارىنا قول ۇشىن سوزعان. امەريكالىق دەسانت مەديتسينالىق ماسكا شىعارا باستادى. ال يسپاندىق اسكەري كۇشتەر سانيتارلىق تازارتقىشتار مەن ءدارى- دارمەكتەردى وندىرۋدە. ا ق ش، قىتاي، يزرايل جانە باسقا ەلدەردىڭ قورعانىس ۆەدومستۆولارىنىڭ عالىمدارى پاندەميا تەحنولوگيالارىن زەرتتەۋ مەن دامىتۋعا باسا نازار اۋداردى. الەم ەلدەرىنىڭ اسكەرى قاۋىپتى ىندەتپەن وسىلاي كۇرەسىپ جاتىر.
اۆتورى: تيمۋر ديۋسەكەيەۆ
