ءۇندىستاندا جول ەرەجەسىن ەشكىم ساقتامايدى

جول اپاتىنا سەبەپ كوپ. كۇننىڭ قولايسىزدىعى، جولدىڭ جايسىزدىعى، ادامي فاكتور، باسقا دا جاعدايلار بار. دەگەنمەن جولدا تارتىپكە باعىنعان ءجون. ءبىراق كوپ اپاتتىڭ سالدارى وسى ەرەجەگە باعىنباۋدىڭ سالدارى.

ءۇندىستاندا جۇرگىزۋشىلەر دە، جاياۋ جۇرگىنشىلەر دە جول ەرەجەسىن ساقتامايدى. كولىكتى قالاي جۇرگىزگىسى كەلسە، سولاي وڭدى-سولدى جۇرە بەرەدى. ناعىز حاوس دەرسىز. وعان ءۇندى جۇرتىنىڭ ەتى ۇيرەنگەن. جول ەرەجەسى تۇگىل، باعدارشامداردى دا ەلەمەيدى. ولاردىڭ ءوز ەرەجەسى بار. جەرگىلىكتى جۇرگىزۋشىلەر ءبىر-ءبىرىن تەك سيگنال بەرۋ ارقىلى تۇسىنىسەدى. جولداعى قوزعالىس سولاي رەتتەلەدى. ەگەر وڭ جاقتاعى جۇرگىزۋشى سيگنال بەرسە، بۇل ونىڭ تەك بار ەكەنىن بىلدىرگەنى. وتكىزىپ جىبەرۋ نە جول بەرۋدى ءوتىنۋى ەمەس. ال كىمدە-كىم قيىلىسقا ءبىرىنشى بوپ جەتسە، ونى باسقا كولىكتەر باسىپ وزا المايدى. ءبىر قىزىعى، ءۇندىستان جولدارىندا بىزدەگىدەي اگرەسسيا جوق. مۇندا جاياۋ ادامعا سيگنال بەرۋى مۇمكىن، ءبىراق جولدان ءبىرىنشى وتكىزەدى. ءتىپتى قول بۇلعاپ، كۇلىمدەپ، اق جول تىلەپ جاتادى.

مىسىردا باعدارشامعا باعىناتىندار از

ءۇندىستانعا مىسىرلىقتار بارسا، قينالا قويماس. ويتكەنى مىسىردا دا جۇرت ءبىر-ءبىرىن دىبىستىق سيگنالدار ارقىلى تۇسىنىسەدى. ءار جۇرگىزۋشى ءتۇرلى سەبەپپەن مىندەتتى تۇردە سيگنال بەرەدى. بۇل ەشكىم ونى باسىپ وزۋعا نەمەسە ونىڭ الدىندا تۇرۋعا تىرىسپاۋى ءۇشىن كەرەك. بۇل ەلدە دە جاياۋ جۇرگىنشىلەر، جەڭىل كولىكتەر، اۆتوبۋستار، جۇك كولىكتەرى، ءتىپتى ەسەكتەر مەن ات اربالارى باعدارشامعا نازار اۋدارماي، ءوز باعىتىمەن جۇرە بەرەدى.

ۇلكەن كولىكتەر جەڭىل كولىكتەردىڭ الدىندا جۇرۋگە قۇقىلى. ءبىراق مۇندا كولىكتەن گورى جاياۋ جۇرگىنشى كوپ. ولار كوشەنى قاي تۇسىنان كەسىپ وتەم دەسە دە، ءوز ەركى. وعان ەشكىم اشۋلانبايدى.

باعدارشامى جوق ەل

الەمدە باعدارشامى جوق جالعىز ەل - بۋتان. بۇل ەلدىڭ تۇرعىندارى باعدارشام قوندىرسا، باعىتىنان جاڭىلىپ قالادى. وسى سەبەپتى بيلىك 1995 -جىلى باعدارشام قوندىرۋ يدەياسىن جۇزەگە اسىرا الماعان. ءارى بۇل ەل تاۋدا تۇرعاندىقتان، باعدارشام ورناتۋ ءتيىمسىز. الايدا ەل استاناسى تحيمپحۋدە جول قوزعالىسىن پوليتسيا رەتتەپ، قاتاڭ باقىلايدى.

ا ق ش- تا جول اپاتىنا جاسوسپىرىمدەر ءجيى ۇشىرايدى

ال الەمدە باعدارشامى كوپ ەل - ا ق ش. سوعان قاراماستان بۇل ەل جول اپاتى بويىنشا رەيتينگتە ءبىرىنشى تۇر. بىلتىر 19 ميلليون 49 مىڭ جول-كولىك وقيعاسى تىركەلگەن. وتكەن جىلدىڭ 9 ايىندا 29 مىڭنان استام ادام كوز جۇمدى. جولداعى كەلەڭسىز وقيعاعا كوپتەگەن فاكتور اسەر ەتەدى.

ەڭ نەگىزگىلەرى: كولىك تىزگىندەپ وتىرىپ، تەلەفونمەن سويلەسۋ، حات جازىسۋ، تاماق ءىشۋ، كولىكتى ماس كۇيىندە ايداۋ.

رەسمي دەرەك بويىنشا بىلتىر ىشىمدىك ءىشىپ كولىك ايداعان 37 ادام كوز جۇمدى. جاس ەرەكشەلىكتەرىنە كەلەر بولساق، جول اپاتىنا كوبىنە جاسوسپىرىمدەر ۇشىرايدى. Teen Driver Source مالىمەتى بويىنشا 2022 -جىلى 15 پەن 20 جاس ارالىعىنداعى 2034 جۇرگىزۋشى جول اپاتىنان كوز جۇمعان. جالپى ءبىزدىڭ ەلدە جۇرگىزۋشى كۋالىگى 18 جاستان باستاپ بەرىلسە، ا ق ش- تا 16 جاستان. كەي شتاتتاردا ءتىپتى 14 جاستان بەرىلەدى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى