ءمينيستردىڭ ءبىرىنشى ورىنباسارى قىز زورلادى دەگەن كۇدىككە ىلىنگەن پوليتسەيگە قاتىستى پىكىر ءبىلدىردى
ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ قىز زورلادى دەگەن كۇدىكپەن قاماۋعا الىنعان تالدىقورعان پوليتسيا باسقارماسىنىڭ باستىعىنا قاتىستى قوزعالعان ءىس بويىنشا پىكىر ءبىلدىردى، دەپ حابارلايدى Kazinform.
«بۇل ءىس بويىنشا تەكسەرۋ جاسالدى. كەشە جەتىسۋ وبلىسىنىڭ پوليتسيا باسشىلارىنا قاتىستى شەشىم جاريالاندى. بۇل وقيعا بويىنشا ۇياتتى جاعداي انىقتالدى، ونى مويىنداۋ كەرەك. كۇدىكتى پوليتسەيدىڭ ويىندا نە جۇرگەنىن بىلە المايمىز. وسىعان دەيىن تەكسەرىستەن تالاي وتكەن بولاتىن، ياعني ءبىرازدان بەرى قىزمەتتە جۇرگەن ادام. ءبىراق وسىنداي تەرىس ارەكەتى انىقتالىپ جاتىر. ونىڭ جاۋاپكەرشىلىگى تەرگەۋ امالدارى مەن سوت شەشىمى ناتيجەسىندە انىقتالادى»، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
تىلشىلەر اتالعان كۇدىكتى پوليتسەيدىڭ بۇعان دەيىنگى تەرىس ارەكەتتەرى بويىنشا سۇراق قويدى. «بۇعان دەيىن دە ول قاراماعىنداعى قىزمەتكەرلەردى بالاعاتتاپ، باسى داۋعا قالعان بولاتىن. سول كەزدە ول نەگە قىزمەتىنەن بوساتىلمادى؟»، - دەپ سۇرادى تىلشىلەر.
ءوز كەزەگىندە م. قوجايەۆ ءتيىستى تەكسەرىس بارىسىندا وسىنداي جاعدايلار انىقتالعانىن ايتتى.
«سول وقيعا كەزىندە ونىڭ لاۋازىمى تومەندەتىلگەن ەدى. ودان كەيىن قىزمەتىن اتقارا كەلە، مىنا لاۋازىمىنا تاعايىندالعان»، - دەدى ءمينيستردىڭ ورىنباسارى.
وبلىس ورتالىعىنىڭ باس پوليتسەيى قىزمەتىن اتقارعان مارات كۇشتىبايەۆتىڭ قىزمەتىن اسىرا پايدالانىپ، جۇمىس كابينەتىندە زورلىق جاساعانى جونىندە بۇعان دەيىن جازعانبىز. وسى وقيعاعا بويىنشا جابىرلەنۋشىنىڭ ادۆوكاتى نۇرلان مولبايەۆ زورلىقتىڭ قالاي جاسالعانىن ايتىپ بەردى.
تالدىقورعاندا قىز زورلادى دەگەن كۇدىكپەن ۇستالعان پوليتسەي قالالىق مامانداندىرىلعان سوتتىڭ سانكتسياسىمەن ەكى اي مەرزىمگە قامالدى.
سونىمەن قاتار، تالدىقورعاندا بولعان سوڭعى رەزونانستىق وقيعاعا بايلانىستى ىشكى ىستەر ءمينيسترى ەرجان سادەنوۆ ءىىم ورتالىق اپپاراتى قىزمەت باسشىلارىنان قۇرالعان ارنايى توپپەن جەتىسۋ وبلىسىنا باردى.
كەزدەسۋدە ءى ءى م باسشىسى جەتىسۋ وبلىسىنىڭ پوليتسيا باسشىلارىنا قاتىستى قابىلدانعان شەشىمدى ايتتى. وسىلايشا وبلىستىق پوليتسيا دەپارتامەنتىنىڭ باستىعى اتىعاي ارىستانوۆ قىزمەتىنەن بوساتىلدى.
ونىڭ ءبىرىنشى ورىنباسارى جاسۇلان بايكەنوۆكە قىزمەتتىك سايكەستىكتىڭ تولىق ەمەستىگى تۋرالى ەسكەرتىلدى.
وبلىستىق دەپارتامەنت باستىعىنىڭ كادر ساياساتى جونىندەگى ورىنباسارى تالانت جۇمابەك پەن تەرگەۋ بويىنشا ورىنباسارى ماقسات ەرەجەپوۆ تە قىزمەتىنەن بوساتىلدى.
اۆتور
رۋسلان عابباسوۆ
