ءماجىلىس تۇركىستان قالاسىنىڭ ەرەكشە مارتەبەسى تۋرالى زاڭدى قابىلدادى
استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا «تۇركىستان قالاسىنىڭ ەرەكشە مارتەبەسى تۋرالى» زاڭى مەن ىلىسپە قۇجات ەكىنشى وقىلىمدا قارالىپ، قابىلداندى.
اتالعان قۇجاتتار 2022 -جىلعى 27 - قىركۇيەكتە مەملەكەت باسشىسىنىڭ تۇركىستان وبلىسىنا جۇمىس ساپارى بارىسىندا بەرىلگەن تاپسىرمانى ىسكە اسىرۋ ماقساتىندا ازىرلەندى.
- ەكىنشى وقىلىمعا دايىندىق بارىسىندا جۇمىس توبى بارلىق تۇسكەن ۇسىنىستار مەن تولىقتىرۋلاردى، ءبىرىنشى وقىلىمدا قارالعان ماسەلەلەردى جان- جاقتى تالقىلادى. نەگىزگى زاڭ جوباسى 3 تاراۋ مەن 13 باپتان تۇرادى. ىلەسپە زاڭ جوباسىندا ساۋلەت، قالا قۇرىلىسى قىزمەتىن نورماتيۆتىك رەتتەۋگە جانە تاريحي- مادەني مۇرا ەسكەرتكىشتەرىن قورعاۋعا باعىتتالعان وزگەرىستەر مەن تولىقتىرۋلار ەنگىزۋ كوزدەلگەن، - دەدى ءماجىلىس دەپۋتاتى تەمىر قىرىقبايەۆ.
اتالعان زاڭدار اياسىندا:
- تۇركىستان قالاسىنا ەرەكشە مارتەبە بەرۋدىڭ نەگىزگى ماقساتتارى، مىندەتتەرى مەن قاعيداتتارى ايقىندالادى؛
- تۇركىستان قالاسىنىڭ اۋماعىندا تاريح جانە مادەنيەت ەسكەرتكىشتەرىن قورعاۋ قامتاماسىز ەتىلەدى؛
- ورتالىق مەملەكەتتىك ورگانداردىڭ، سونداي-اق تۇركىستان قالاسىنىڭ جەرگىلىكتى وكىلدى جانە اتقارۋشى ورگاندارىنىڭ وكىلەتتىكتەرى قايتادان قاراستىرىلىپ، جاڭا قۇزىرەت بەرىلەدى.
- ناتيجەسىندە، رۋحاني، تاريحي-مادەني مۇرامىزدى ساقتاۋ، قولونەرشىلەردى قولداۋ، ءتۋريزمدى دامىتۋ، قالادا كەدەرگىسىز ورتانى قالىپتاستىرۋ جانە باسقا دا يگى ىستەر بويىنشا جۇمىس قولعا الىنادى، - دەدى دەپۋتات.
بۇدان بۇرىن حابارلانعانداي، تۇركىستان وبلىسى اكىمىنىڭ ورىنباسارى بەيسەنباي تاجىبايەۆ تۇركىستان قالاسىنا زاڭمەن ەرەكشە مارتەبە بەرىلسە، شاھار اۋماعىندا جەر ءۇي سالۋدىڭ تالاپتارى قالاي وزگەرەتىنىن ايتتى.
