ءماجىلىس قىتايمەن ارادا قۇقىقتىق كومەك كورسەتۋگە قاتىستى زاڭدى قابىلدادى
استانا. KAZINFORM - بۇگىن ءماجىلىستىڭ جالپى وتىرىسىندا «1993 -جىلعى 14-قاڭتارداعى قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭى قابىلداندى.
«حاتتاما اياسىندا قازاقستان رەسپۋبليكاسىنىڭ اۋماعىندا شەتەلدىك سوتتاردىڭ شەشىمدەرى مەن وتىنىشتەرىن ورىنداۋ سالاسىندا قۇقىقتىق كومەك كورسەتۋ جونىندەگى سوت ورگاندارىنىڭ فۋنكتسيالارىن ناقتىلاۋ بويىنشا شارتتىڭ 2-بابىنا وزگەرىس ەنگىزىلەدى. حاتتامادا مىناداي ورتالىق مەكەمەلەر ايقىندالعان: قازاقستان جاعىنان - جوعارعى سوت، باس پروكۋراتۋرا جانە ادىلەت مينيسترلىگى، ال قىتاي تاراپىنان - ادىلەت مينيسترلىگى، جوعارعى حالىق پروكۋراتۋراسى جانە جوعارعى حالىق سوتى. حاتتاما «قازاقستان رەسپۋبليكاسىنىڭ حالىقارالىق شارتتارى تۋرالى» زاڭنىڭ 27-بابىنىڭ 4-تارماعىنا سايكەس راتيفيكاتسيالاۋعا جاتادى»، - ادىلەت ءمينيسترى ازامات ەسقارايەۆ.
بۇل وزگەرىستەر ازاماتتاردىڭ وزدەرىنىڭ دە، ۋاكىلەتتى ورگانداردىڭ دا وتىنىشتەردى قۇزىرەتتى ورگاننان ۋاعدالاسۋشى تاراپتاردىڭ جوعارعى سوتىنا دەيىن قايتا جىبەرۋ جونىندەگى ۋاقىتشا شىعىندارىن بولدىرمايدى. بۇل ءوز كەزەگىندە ازاماتتار مەن زاڭدى تۇلعالاردىڭ زاڭدى مۇددەلەرىن قورعاۋ ماسەلەلەرىن اناعۇرلىم تەز شەشۋگە ىقپال ەتەتىن بولادى.
ونىڭ ايتۋىنشا، حاتتامانى راتيفيكاتسيالاۋ قازاقستان مەن قىتاي ازاماتتارىنىڭ قۇقىقتارىن قورعاۋعا باعىتتالعان ازاماتتىق جانە قىلمىستىق ىستەر بويىنشا قۇقىقتىق كومەك كورسەتۋ سالاسىنداعى ەكىجاقتى ىنتىماقتاستىقتى ودان ءارى نىعايتۋعا ىقپال ەتەدى.
«زاڭدى قابىلداۋ تەرىس الەۋمەتتىك-ەكونوميكالىق جانە قۇقىقتىق سالدارعا اكەپ سوقپايدى، سونداي-اق رەسپۋبليكالىق بيۋدجەتتەن قوسىمشا قارجىلىق شىعىنداردى تالاپ ەتپەيدى»، - دەدى مينيستر.
اۆتور
رۋسلان عابباسوۆ
