ءماجىلىس ۇلتتىق قاۋىپسىزدىكتى قامتاماسىز ەتۋگە باعىتتالعان زاڭدى قابىلدادى
بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قاۋىپسىزدىكتى قامتاماسىز ەتۋ جانە قازاقستان رەسپۋبليكاسىنىڭ ارناۋلى مەملەكەتتىك ورگاندارىنداعى قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ەكىنشى وقىلىمدا قارالىپ، تالقىلاۋدان كەيىن قابىلداندى، دەپ حابارلايدى Kazinform.
زاڭ جوباسىنىڭ ماقساتى - ۇلتتىق قاۋىپسىزدىكتى قامتاماسىز ەتۋ سالاسىنداعى زاڭنامانى ودان ءارى جەتىلدىرۋ.
قۇجاتتى تالقىلاۋ بارىسىندا دەپۋتاتتار ءبىرقاتار تۇزەتۋ ەنگىزدى. ونىڭ ىشىندە قازاقستان رەسپۋبليكاسى تەرروريزمگە قارسى ورتالىعىنىڭ جانە جەرگىلىكتى اتقارۋشى ورگانداردىڭ ەكسترەميزمنىڭ الدىن الۋدى ۇيلەستىرۋ ءارى ۇيىمداستىرۋ جونىندەگى قۇزىرەتىن كەڭەيتۋ ۇسىنىلادى.
الەۋمەتتىك سيپاتتاعى توتەنشە جاعدايدىڭ الدىن الۋ جانە ونى جويۋ جونىندە شارالار قابىلداۋ ءۇشىن، سونداي- اق توتەنشە نەمەسە اسكەري جاعداي ەنگىزىلگەن كەزدە مەملەكەتتىك مەكەمەلەردىڭ ءبىرىنشى باسشىلارىنا مەكەمەلەردىڭ مۇلكىن قۇقىق قورعاۋ ءارى ارناۋلى مەملەكەتتىك ورگاندارعا، قر قارۋلى كۇشتەرىنە جانە باسقا دا اسكەرلەر مەن اسكەري قۇرىلىمدارعا بەرۋ جونىندەگى وكىلەتتىكتەر بەرۋ ەسكەرىلگەنى.
بۇدان بولەك، مەملەكەتتىك قۇپيالاردى قورعاۋ شارالارىن كۇشەيتۋ ماقساتىندا دەپۋتاتتار مەملەكەتتىك قىزمەتشىلەر مەن مەملەكەتتىك قىزمەتتە جوق ادامدار ءۇشىن مەملەكەتتىك قۇپيالارعا رۇقسات بەرۋدىڭ ءبىرىڭعاي تالاپتارىن بەلگىلەيتىن نورمالاردى ەنگىزدى.
سونىمەن قاتار، دەپۋتاتتار قۇقىقتىق ولقىلىقتاردى جويۋعا جانە ارناۋلى مەملەكەتتىك ورگانداردا قىزمەت وتكەرۋ كەزىندە ورگاندار قىزمەتكەرلەرىنىڭ الەۋمەتتىك كەپىلدىكتەرىن نىعايتۋعا باعىتتالعان نورمالاردى ازىرلەدى. اتاپ ايتقاندا، تۇزەتۋلەر ارقىلى اتاقتار بەرۋ، اتتەستاتتاۋدان ءوتۋ جانە جوعارى وقۋ ورىندارىندا وقۋ ءتارتىبى جەتىلدىرىلەدى.
مەملەكەت باسشىسىنىڭ ءتيىستى تاپسىرمالارىن ىسكە اسىرۋ ماقساتىندا دەپۋتاتتار قىزمەتكەرلەردى ۇلتتىق قاۋىپسىزدىك ورگاندارىنان بوساتۋدىڭ نەعۇرلىم يكەمدى شارتتارىن ۇسىندى. ايتالىق، جيىرما بەس جىلدان استام ەڭبەك سىڭىرگەن قىزمەتكەرلەردى ءوز قالاۋى بويىنشا جۇمىستان بوساتۋ قۇقىعى قاراستىرىلعان.
