ءماجىلىس دەپۋتاتتىعىنان كەتكەن شۇكىجانوۆا قاي سالادا قىزمەت ەتەتىنى بەلگىلى بولدى
استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا دەپۋتات دينارا شۇكىجانوۆانىڭ وكىلەتتىگى مەرزىمىنەن بۇرىن توقتاتىلدى.
«پارلامەنت ءماجىلىسىنىڭ دەپۋتاتى دينارا امانجەل قىزى شۇكىجانوۆا مىندەتتەرىن اتقارۋدان ءوز ەركىمەن بوساتۋ تۋرالى ءوتىنىش بەردى. وسىعان وراي، ورتالىق سايلاۋ كوميسسياسى سىزدەردىڭ نازارلارىڭىزعا كونستيتۋتسيانىڭ 52-بابىنا، «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 24-بابى 3 جانە 8-تارماقتارىنا سايكەس، ءماجىلىس دەپۋتاتى د. شۇكىجانوۆانىڭ ءوتىنىش بەرۋىنە بايلانىستى ونىڭ وكىلەتتىلىگىن مەرزىمىنەن بۇرىن توقتاتۋ تۋرالى ماسەلەنى شەشۋ ءۇشىن ۇسىنىم ەنگىزىپ وتىر»، - دەدى ورتالىق سايلاۋ كوميسسياسىنىڭ مۇشەسى شاۆحات وتەمىسوۆ.
جالپى وتىرىستا پالاتا دەپۋتاتتارى اتالعان ۇسىنىمعا داۋىس بەرىپ، د. شۇكىجانوۆانىڭ وكىلەتتىگىن مەرزىمىنەن بۇرىن توقتاتۋ تۋرالى شەشىم قابىلدادى.
«ماجىلىسكە كەلگەنگە دەيىن دەپۋتاتتارعا قانداي وراسان زور جۇمىس پەن جاۋاپكەرشىلىك جۇكتەلەتىنىن بىلمەدىم. مەن Respublica پارتياسىنىڭ تەڭ ءتوراعاسى بولىپ قالا بەرەمىن جانە حالىق پەن بيزنەستىڭ مۇددەسىن قورعاۋدى جالعاستىرامىن. وڭىردەگى وندىرىسكە ورالىپ جاتىرمىن. بۇل رەتتە، ەلىمىزدىڭ ەكونوميكاسىنا ودان ءارى پايدا اكەلەتىنىمە سەنەمىن»، - دەدى دينارا امانجەل قىزى.
اۆتور
رۋسلان عابباسوۆ
