«Chia-Tai» قارجى پيراميداسىن ۇيىمداستىرعان ايەل ۇستالدى
قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتى «Chia-Tai-Tianqing Pharmaceutical» قارجى پيراميداسىنىڭ قىزىلوردا قالاسىنداعى قۇرىلىمدىق بولىمشەسىن باسقارعان كۇدىكتىنى قاماۋعا الدى، دەپ حابارلايدى Kazinform.
وبلىس ورتالىعىندا تۇراتىن 1992-جىلعى ا. پ ەسىمدى ازاماتشا قالا اۋماعىندا 2022-جىلدىڭ قاراشاسى مەن 2023-جىلدىڭ ءساۋىر ايى ارالىعىندا قارجى (ينۆەستيتسيالىق) پيراميداسىن قۇرعان.
«ول تارتىلعان قاراجات ارقىلى قابىلدانعان مىندەتتەمەلەردى قامتاماسىز ەتەتىن كاسىپكەرلىك قىزمەتكە پايدالانباي، جەكە، زاڭدى تۇلعالاردىڭ اقشاسىن نەمەسە وزگەنىڭ مۇلكىن نە وعان قۇقىعىن قايتا ءبولۋ جانە ءبىر قاتىسۋشىنى باسقالاردىڭ جارناسى ەسەبىنەن بايىتۋ ارقىلى وسى اكتيۆتەردى تارتۋدان تابىس الۋ (مۇلىكتىك پايدا تابۋ) جونىندەگى قىزمەتتى ۇيىمداستىرعان. سول سياقتى قارجىلىق پيراميدانىڭ قۇرىلىمدىق بولىمشەسىنە باسشىلىق ەتىپ، اقشانى نەمەسە وزگە مۇلىكتى تارتا وتىرىپ، ق ر قىلمىستىق كودەكسىنىڭ 217-بابى 3-بولىگى 2) تارماعىندا كوزدەلگەن قىلمىستىق قۇقىق بۇزۋشىلىقتى قاساقانا جاساعان»، - دەپ ءمالىم ەتتى قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتى.
ۆەدومستۆو مالىمەتىنشە، اتالعان ازاماتشانىڭ 24 سالىمشىعا جالپى 26130190 تەڭگە كولەمىندە اسا ءىرى مولشەردە مۇلىكتىك زالال كەلتىرگەنى انىقتالدى.
بۇل كومپانيا ءوزىن ينۆەستيتسيالىق ۇيىم رەتىندە كورسەتىپ، جوعارى جانە تۇراقتى تابىس اكەلۋگە ۋادە بەرگەن.
ەسكە سالساق، بۇدان بۇرىن قىزىلوردا وبلىسىندا مەملەكەتكە 101 ميلليون تەڭگە قايتارىلدى.
