ءۇش جىلدىڭ ىشىندە قازاقستان جاڭا تۇرپاتتى ەل بولدى - پرەزيدەنت
بۋراباي. KAZINFORM - ءۇش جىلدا ساياسي رەفورمالار جان-جاقتى وزگەرىستەر جاساۋعا مۇمكىندىك بەردى. بۇل تۋرالى بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى.
- ەڭ الدىمەن بۇگىن امال كۇنى بارشاڭىزعا قۇتتى بولسىن دەگىم كەلەدى. قىستان امان-ەسەن شىعىپ، اعايىن-باۋىرمەن كورىسۋ - ەجەلدەن كەلە جاتقان اتا ءداستۇرىمىز. بۇل كۇن - ءاز-ناۋرىزدىڭ باستاۋى. ەلىمىزدىڭ ءتول مەرەكەسى بيىل دا قاسيەتتى ورازا ايىنا ورايلاس كەلىپ وتىر. قاستەرلى مەيرامدارىمىز حالقىمىزدى يگى امالدار جاساۋعا ۇندەيدى. اسىل قاسيەتتەرىمىزدى كەڭىنەن دارىپتەيدى. قۇرىلتايدىڭ ۇلىق مەرەكەلەرمەن قاتار ءوتىپ جاتقانى - جاقسىلىقتىڭ نىشانى، - دەدى قاسىم-جومارت توقايەۆ.
مەملەكەت باسشىسى وسىدان ءۇش جىل بۇرىن ناۋرىز ايىندا ارنايى جولداۋ جاريالاعانىن ەسكە سالدى.
- ەلىمىزدى تۇبەگەيلى جاڭعىرتۋ ءۇشىن اۋقىمدى رەفورما جاسايتىنىمىزدى ايتتىم. سول كەزدە العاش رەت ۇلتتىق قۇرىلتاي تۋرالى باستاما كوتەردىم. ءۇش جىلدىڭ ىشىندە قازاقستان جاڭا تۇرپاتتى ەل بولدى. ساياسي رەفورمالار جان-جاقتى وزگەرىستەر جاساۋعا مۇمكىندىك بەردى. جالپىحالىقتىق رەفەرەندۋم ارقىلى اتا زاڭعا تۇزەتۋلەر ەنگىزىلدى. پارلامەنتتىڭ قۇزىرى كەڭەيدى، ۇكىمەتتىڭ جاۋاپكەرشىلىگى ارتتى. ادام قۇقىقتارىن قورعاۋ جۇيەسى جاقساردى. كونستيتۋتسيالىق سوت قۇرىلدى. شەشىم قابىلداۋ ۇدەرىسىنە ازاماتتاردىڭ بەلسەنە قاتىسۋىنا جول اشىلدى. باسقا دا باعىتتاردا ماڭىزدى رەفورمالار جاسالدى، - دەدى پرەزيدەنت.
بۇدان بۇرىن حابارلانعانداي، بۋرابايدا پرەزيدەنت قاسىم-جومارت توقايەۆتىڭ قاتىسۋىمەن ۇلتتىق قۇرىلتايدىڭ IV وتىرىسى باستالدى.
