ءۇش بىردەي قازاق فيلمى «ازيا وسكارىن» جەڭىپ الدى
اۆستراليادا Asia Pacific Screen Awards ازيالىق بەدەلدى كينوسىيلىعى ءوز جەڭىمپازدارىنىڭ ەسىمدەرىن جاريالادى.
بيىل ءۇش قازاقستاندىق فيلم - اسحات كۋچينچيرەكوۆتىڭ «باۋىرىنا سالۋ»، دارحان تولەگەنوۆتىڭ «اعايىندى» جانە ايسۇلتان سەيىتوۆتىڭ «قاش» كارتينالارى جۇلدەگەرلەر قاتارىنا ەندى. ايتا كەتەتىن جايت - ءۇش فيلم دە رەجيسسەرلەردىڭ دەبيۋت جۇمىسى، دەپ حابارلايدى Kazinform.
ونىڭ ىشىندە ەكى فيلم، اتاپ ايتساق، «باۋىرىنا سالۋ» مەن «اعايىندى» مادەنيەت جانە اقپارات مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن.
«باۋىرىنا سالۋ» «ۇزدىك جاستار فيلمى» نوميناتسياسىندا جەڭىسكە جەتسە، «اعايىندى» كارتيناسىندا باستى رولدەردى سومداعان ايبار سالى مەن الىشەر يسمايلوۆ «ۇزدىك جاڭا قويىلىم» ءۇشىن جۇلدەگە يە بولدى.
ال «قاش» تۋىندىسى «ۇزدىك وپەراتورلىق جۇمىس» نوميناتسياسىندا ماراپاتقا يە بولدى.
ال APSA- نىڭ باس جۇلدەسىن «ۇزدىك فيلم» نوميناتسياسىندا ايگىلى نەمىس رەجيسسەرى ۆيم ۆەندەرستىڭ «پرەكراسنىە دني» اتتى جاپوندىق كارتيناسى جەڭىپ الدى.
بيىل «ساندەنس» جانە بەرلين كينوفەستيۆالىنە قاتىسقان، فەستيۆالدەردىڭ حيتى بولعان «پروشلىە جيزني» فيلمى سەلين سونعا ەڭ ۇزدىك رەجيسسەر اتاعىن اكەلدى.
كەشتىڭ تاعى ءبىر فاۆوريتى ريۋسۋكە حاماگۋتيدىڭ «زلا نە سۋشەستۆۋەت» جاپوندىق دراماسى قازىلار القاسىنىڭ گران- پريىنە قول جەتكىزدى.
«باۋىرىنا سالۋ» فيلمى ءسابي كەزىنەن اجەسىنىڭ تاربيەسىندە بولعان بالانىڭ وقيعاسىن باياندايدى.
تۋىندىنىڭ تۇساۋى وسى جىلى يسپانيانىڭ سان- سەباستيان قالاسىندا وتكەن بەدەلدى كينوفەستيۆالدە كەسىلدى، وندا ول «جاڭا رەجيسسەرلەر» باعدارلاماسىندا كورسەتىلدى.
«اعايىندى» فيلمى وتكەن جىلدىڭ قىركۇيەگىندە گەرمانياداعى Oldenburg International Film Festival فەستيۆالىندە «كينو رۋحى» سىيلىعىن جەڭىپ العان بولاتىن، ال وسى جىلدىڭ ءساۋىر ايىندا قازاقستاننىڭ كينوسىنشىلار قاۋىمداستىعى بۇل كارتينانى 2022 -جىلدىڭ «ۇزدىك دراماسى» دەپ تانىدى.
سونىمەن قاتار، «اعايىندى» — يتاليا، رەسەي، وزبەكستان، قىتاي، يسپانيا جانە بولگارياداعى حالىقارالىق كينوفەستيۆالدەردە 10 ماراپاتقا يە بولدى.
«قاش» فيلمى قازاق دالاسىنداعى 30-جىلدارداعى اشارشىلىق كەزىندەگى حالىقتىڭ قيىن تاعدىرى تۋرالى باياندايدى. قابىر قازۋشى يساتاي ءوز اۋىلىن قۇتقارۋ ءۇشىن قاۋىپتى ميسسياعا بارادى، ءبىراق جولدا وعان كەزبە ادام كەزدەسىپ، ونى اداستىرادى. ايتا كەتسەك، ايسۇلتان سەيىتوۆ جازدا شانحاي حالىقارالىق كينوفەستيۆالىندە وسى جۇمىسى ءۇشىن «ۇزدىك رەجيسسەر» نوميناتسياسىن جەڭىپ الدى.
APSA سىيلىعى 2007 -جىلى يۋنەسكو مەن FIAPF — حالىقارالىق كينوپروديۋسەرلەر قاۋىمداستىعىنىڭ كومەگىمەن اۆستراليا ۇكىمەتىنىڭ باستاماسىمەن قۇرىلعان.
ول جىل سايىن حالىقارالىق ماراپاتتار اراسىندا ماڭىزدى ورىن الىپ كەلەدى، ءسويتىپ كينەماتوگرافيا الەمىندە «ازيالىق وسكار» دەپ اتالادى.
سىيلىق جىل سايىن ازيا- تىنىق مۇحيتى ايماعىنىڭ 70تەن استام ەلىنىڭ وكىلدەرى جاساعان ەڭ كورنەكتى كارتينالاردى اتاپ وتەدى.
وتكەن جىلدار جەڭىمپازدارىنىڭ قاتارىندا 2019 -جىلى «ۇزدىك رەجيسسەر» نوميناتسياسىندا جەڭىسكە جەتكەن بەلگىلى قازاقستاندىق رەجيسسەر ءادىلحان ەرجانوۆ بار.
اۆتور
جانات قاپالبايەۆا
