ءدىني قىزمەت سالاسىنداعى زاڭناماعا قانداي وزگەرىستەر ەنگىزىلمەك
ءماجىلىس دەپۋتاتتارىنىڭ ساۋالىنا جاۋاپ بەرگەن پرەمەر-مينيستر ءاليحان سمايىلوۆ ءدىني قىزمەت سالاسىنداعى زاڭناماعا قانداي وزگەرىستەر ەنگىزۋ ماسەلەسى پىسىقتالىپ جاتقانىن ايتتى، دەپ حابارلايدى Kazinform.
«بۇل ماسەلەنىڭ قازىرگى جاعدايداعى وزەكتىلىگىن ەسكەرە وتىرىپ، ۇكىمەت ءدىني قىزمەت سالاسىنداعى زاڭنامانى، اتاپ ايتقاندا «دەسترۋكتيۆتى ءدىني اعىم» جانە «ءدىني راديكاليزم» ۇعىمدارىن ەنگىزۋ؛ دەسترۋكتيۆتى ءدىني اعىمداردى ۇستانۋشىلارمەن وڭالتۋ جۇمىسىن زاڭنامالىق قامتاماسىز ەتۋ؛ ءدىني ادەبيەتتەردى، اقپاراتتىق ماتەريالدار مەن ءدىني ماقساتتاعى زاتتاردى تاراتۋعا مۇمكىندىك بەرەتىن سۋبەكتىلەردىڭ تىزبەسىن ازىرلەۋ؛ ينتەرنەت-رەسۋرستار؛ قوعامدىق ورىنداردا بەتتى تانۋعا كەدەرگى كەلتىرەتىن كيىم زاتتارىن كيۋگە شەكتەۋلەر ەنگىزۋ جانە تاعى باسقالارىن جەتىلدىرۋ بويىنشا جۇمىس اتقارۋدا»، - دەپ اتاپ وتەدى ۇكىمەت باسشىسى جاۋابىندا.
پرەمەر-ءمينيستردىڭ اتاپ وتۋىنشە، اتالعان تۇزەتۋلەردى تالقىلاۋ جانە كەلىسىلگەن شەشىم ازىرلەۋ ماقساتىندا قازاقستان مۇسىلماندارى ءدىني باسقارماسىمەن، تەولوگتارمەن، ساراپشىلار قاۋىمداستىعى جانە مۇددەلى مەملەكەتتىك ورگاندارمەن بىرلەسكەن وتىرىستار، دوڭگەلەك ۇستەلدەر مەن سەمينارلار وتكىزىلىپ جاتىر.
