ءدىن سالاسىنداعى مەملەكەت ساياساتىن دامىتۋدىڭ 5 جىلدىق تۇجىرىمداسى ازىرلەنۋدە
ءدىن سالاسىنداعى مەملەكەت ساياساتىن دامىتۋدىڭ 2024-2028-جىلدارعا ارنالعان تۇجىرىمداماسى ازىرلەنىپ جاتىر. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Kazinform.
«ەكسترەميزم مەن تەرروريزمگە قارسى ءىس-قيمىلدىڭ مەملەكەتتىك جۇيەسىن دامىتۋدىڭ 2023-2025-جىلدارعا ارنالعان كەشەندى جوسپارى (بۇدان ءارى - كەشەندى جوسپار) جۇزەگە اسۋدا. ۆەدومستۆوارالىق ۇيلەستىرۋدى جەتىلدىرۋ، ەكسترەميزمگە قارسى ءىس-قيمىل جونىندەگى قوسىمشا شارالار كەشەنىن ازىرلەۋ، جەكە تۇلعانى، قوعامدى جانە مەملەكەتتى زورلىق-زومبىلىق سيپاتىنداعى ەكسترەميستىك كورىنىستەردەن جانە تەرروريزم قاتەرلەرىنەن سەنىمدى قورعاۋدى قامتاماسىز ەتۋ جونىندەگى ءىس-شارالار جۇرگىزىلۋدە. تۋريزم جانە سپورت مينيسترلىگى ىشكى ىستەر مينيسترلىگىمەن، ۇلتتىق قاۋىپسىزدىك كوميتەتىمەن، باس پروكۋراتۋرامەن جانە وزگە دە مۇددەلى مەملەكەتتىك ورگاندارمەن بىرلەسىپ، سپورت سالاسىندا دەسترۋكتيۆتى ءدىني يدەولوگيانىڭ تارالۋىنا جول بەرمەۋ جونىندەگى جول كارتاسىنىڭ جوباسىن ازىرلەدى»، - دەپ اتاپ وتەدى ۇكىمەت باسشىسى جاۋابىندا.
پرەمەر-ءمينيستردىڭ اتاپ وتۋىنشە، قازىرگى زامانعى سىن-قاتەرلەردى نازارعا الا وتىرىپ، ۇكىمەت دەڭگەيىندە جۇيەلى شارالاردى تالقىلاۋ جانە ازىرلەۋ ماقساتىندا قازاقستان مۇسىلماندارى ءدىني باسقارماسى باسشىلىعىمەن، سونداي-اق بەلگىلى تەولوگتارمەن جانە وڭىرلىك ساراپشىلار توبىمەن كەزدەسۋلەر وتكىزىلدى. وندا اعىمداعى ءدىني احۋال، پروبلەمالىق ماسەلەلەر جانە ولاردى شەشۋ جولدارى تالقىلاندى.
«كەزدەسۋلەر جانە ايتىلعان ۇسىنىستاردىڭ ناتيجەلەرى بويىنشا قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىن دامىتۋدىڭ 2024-2028-جىلدارعا ارنالعان تۇجىرىمداماسى ازىرلەنۋدە»، - دەدى ءاليحان سمايىلوۆ.
