ءدارى-دارمەكتى رەتسەپتىسىز ساتۋ ماسەلەسى رەتتەلمەي تۇر

- 2023 -جىلى رەتسەپتىسىز ءدارى-دارمەك ساتۋ بويىنشا 100 اكىمشىلىك قۇقىق بۇزۋشىلىق فاكتىسى تىركەلسە، 2024 -جىلى بۇل كورسەتكىش 104 كە جەتكەن. قازاقستان رەسپۋبليكاسىنىڭ «اكىمشىلىك قۇقىق بۇزۋشىلىق تۋرالى» كودەكسىنىڭ 426-بابىنىڭ 1-بولىگىنە سايكەس اكىمشىلىك قۇقىق بۇزۋشىلىق تۋرالى ىستەر جونىندەگى حاتتاما جاسالدى، - دەيدى مەديتسينالىق جانە فارماتسيەۆتيكالىق باقىلاۋ كوميتەتى.

سونداي-اق كوميتەت قىزمەتكەرلەرى ءدارى-دارمەكتى رەتسەپتىسىز بوساتقاندار قانداي جازا ارقالايتىنىن دا ايتىپ بەردى.

- دارىلىك زاتتاردى، مەديتسينالىق بۇيىمداردى تىركەۋ جانە قايتا تىركەۋ، ءوندىرۋ، دايىنداۋ جانە ولاردىڭ ساپاسىن باقىلاۋ، سىناۋ، اكەلۋ، ساتىپ الۋ، تاسىمالداۋ، ساقتاۋ، تاڭبالاۋ، دارىلىك زاتتارعا بەلگىلەنگەن شەكتى باعالاردى اسىرىپ جىبەرۋدى قوسا العاندا، وتكىزۋ قاعيدالارىن، سونداي-اق قولدانۋ، قامتاماسىز ەتۋ، جويۋ، جارنامالاۋ قاعيدالارىن بۇزۋ، ەگەر بۇل ادامنىڭ دەنساۋلىعىنا زيان كەلتىرۋگە الىپ كەلمەسە، - جەكە تۇلعالارعا - 70، لاۋازىمدى ادامدارعا - 100، شاعىن كاسىپكەرلىك سۋبەكتىلەرىنە - 130، ورتا كاسىپكەرلىك سۋبەكتىلەرىنە - 200، ءىرى كاسىپكەرلىك سۋبەكتىلەرىنە 1000 ايلىق ەسەپتىك كورسەتكىش مولشەرىندە ايىپپۇل سالىنادى، - دەيدى مينيسترلىك.

ۆەدومستۆو ماماندارى اتالعان زاڭبۇزۋشىلىقتىڭ كۋاسى بولعان تۇرعىندار eOtinish ءبىرىڭعاي پلاتفورماسى ارقىلى حابارلاي الاتىنىن ايتادى. ەگەر شاعىمدا ناقتى دالەلدەر بولسا، جاۋاپتىلار بىردەن تەكسەرىس جۇمىستارىنا كىرىسەدى.

ەسكە سالا كەتەيىك، وتكەن جولى جەمقورلىقتىڭ الدىن الۋ ءۇشىن تەگىن ءدارى-دارمەكتەردى بەرۋ جۇيەسىنە وزگەرىس ەنگىزىلەتىنىن جازعان ەدىك.

اۆتور

ارۋجان ماحمۋت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى