ءبىز تىم تويشىل، ساۋىقشىل بولىپ كەتتىك - ءماجىلىس دەپۋتاتى
استانا. KAZINFORM – ءماجىلىس دەپۋتاتى ابزال قۇسپان El.kz اقپارات اگەنتتىگىنە بەرگەن ەكسكليۋزيۆتى سۇحباتىندا ۇنەمشىلدىككە قاتىستى پىكىر ءبىلدىردى.
ونىڭ ايتۋىنشا، ەلدە تويحانا سالۋدان جارىس باستالىپ كەتكەن.
ەلگە اقىل ايتقانداي بولعىم كەلمەيدى، ءبىراق ءبىز كەرەمەت ۇنەمشىل حالىقپىز دەپ ايتا المايمىن. مەن توي-تومالاققا كوپ بارمايمىن. كەي زامانداستارىم تويدان شارشاپ ءجۇرمىز دەپ قينالادى. كىم ولاردى قيناپ جاتىر؟ وسى جەردە ءبىر نارسەنى ايتا كەتۋىمىز كەرەك. ءبىز بۇرىنعىعا قاراعاندا تىم تويشىل، ساۋىقشىل بولىپ كەتتىك. بۇگىنگىدەي سالتانات سارايلارىن قاي اتامىزدان كورىپ ەدىك؟ بىزدە ونداي ەشقاشان بولماعان. مەن ۇيلەنگەندە تويىمدى اۋلاداعى شاتىردا جاسادىم. تامادا دا جالداعام جوق. تويدى كورشىم جۇرگىزىپ بەردى. ال قازىر ءساندى سارايلار ءالى سالىنىپ جاتىر. بۇكىل وڭىردە تويحانا سالۋدان جارىس باستالدى. سول تويدى جاسايتىن تەك قازاقتار. 300-400 ادام شاقىرىپ، دۇركىرەتىپ توي جاساپ جاتقان وزگە ۇلت وكىلىن كوردىڭىز بە؟ بەلبەۋدى تارتۋ كەرەك دەگەندە وسى ماقساتتى مەڭزەپ ايتىپ وتىرمىن. قازىر جاستاردىڭ اراسىندا مىناداي ءبىر ترەند شىقتى، - دەيدى دەپۋتات.
ول توي، تۋعان كۇندى شەتەلدە جاسايتىندار كوبەيدى دەپ وتىر.
بىرەۋ دۋبايدا تويىن جاساسا، ەلدەن قالمايىن دەپ سوعان ارتىنىپ-تارتىنىپ، قارىزدانىپ باراتىندار بار. جۇرتقا اقىل ايتپاس بۇرىن سول تالاپقا ءوزىڭ ساي بولۋىڭ كەرەك قوي. مەن تۋعان كۇنىمدى ومىرىمدە ءبىر-اق رەت جاساپپىن. ونىڭ ءوزى جاستىقپەن بولدى. ودان بەرى ءوزىمنىڭ نەمەسە جارىمنىڭ تۋعان كۇنىن مەيرامحانادا وتكىزگەن ەمەسپىن. مىنە، وسىنداي شىعىنداردى شەكتەۋگە بولادى عوي. كەز كەلگەن تويحاناعا حابارلاسساڭ سەنبى- جەكسەنبى كۇندەرى بىرەۋى بوس ەمەس. رەتسىز شىعىنداردى شەكتەسەك، ءسىزدىڭ تاپقان جالاقىڭىز جىرتىعىڭىزدى جاماۋعا جەتىپ، جاقسى ءومىر سۇرۋگە جەتكىلىكتى بولار ەدى. «جۇرت سويلەيدى، جۇرتتان قالماۋ كەرەك» دەگەننەن ارىلۋ كەرەكپىز. بۇنى وسى قاعيدانى ۇستاناتىن ادام رەتىندە ايتىپ وتىرمىن، - دەدى ابزال قۇسپان.
