ءبىز جاساندى ينتەلەكتتى قازاقشا ويلاۋعا، ساراپتاۋعا جانە سويلەۋگە ۇيرەتتىك - پرەزيدەنت

بۇل تۋرالى مەملەكەت باسشىسى قاسىم-جومارت توقايەۆ توقايەۆ AIemai حالىقارالىق جاساندى ينتەللەكت ورتالىعىنا بارعاندا ايتتى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى ول مەملەكەتتىڭ، بيزنەستىڭ جانە ج ي- عا قىزىعۋشىلىعى زور ازاماتتاردىڭ جاساندى ينتەللەكت مودەلدەرىن ويلاپ تابۋىنا، ءبىلىم الۋىنا جانە دامۋىنا جول اشادى.

- بۇل سالادا تىڭعىلىقتى اتقارىلعان ءىستىڭ ءبىر مىسالى - KazLLM ءتىل مودەلى. ءبىز جاساندى ينتەلەكتتى قازاقشا ويلاۋعا، ساراپتاۋعا جانە سويلەۋگە ۇيرەتتىك. بۇل ايتارلىقتاي جەتىستىك قازاق ءتىلىن سيفرلىق ورتادا دامىتۋ ءۇشىن زور مۇمكىندىك بەرەدى. باستالعان ۇلكەن ءىستى جالعاستىرۋ كەرەك. الدىمىزدا ءتۇرلى سيپاتتاعى دەرەكتەردى ءبىر مەزەتتە قولدانا الاتىن قازاق ءتىلىنىڭ مۋلتيمودالدى تىلدىك مودەلىن جاساۋ مىندەتى تۇر. ۇكىمەتكە وسى باعىتتاعى جوبالاردى قارجىلاندىرۋ ماسەلەسىن پىسىقتاۋدى تاپسىرامىن، - دەدى مەملەكەت باسشىسى.

پرەزيدەنت ازاماتتاردىڭ جاساندى ينتەللەكت سالاسىنداعى ساۋاتىن اشىپ، بىلىكتىلىگىن ارتتىرۋ قاجەت ەكەنىنە نازار اۋداردى.

قاسىم- جومارت توقايەۆتىڭ ايتۋىنشا، بەس جىل ىشىندە 1 ميلليون ادامدى جاساندى ينتەللەكت داعدىلارىنا ۇيرەتۋ مىندەتىنە ەرەكشە كوڭىل بولگەن ءجون. وقۋشىلارعا، ستۋدەنتتەرگە، مەملەكەتتىك قىزمەتكەرلەر مەن كاسىپكەرلەرگە ارنالعان باعدارلاماعا بارىنشا قولداۋ كورسەتىلۋگە ءتيىس.

- ج ي تەحنولوگيالارى سالاسىنداعى وتاندىق جانە حالىقارالىق ءبىلىم بەرۋ باعدارلامالارى ەلىمىزدىڭ كادرلىق الەۋەتىن ارتتىرۋعا ۇلەس قوسا الادى. ۇكىمەتكە جاساندى ينتەللەكت باعىتىندا مامان دايارلاۋعا ارنالعان AI- Sana باعدارلاماسىن كەزەڭ- كەزەڭىمەن جۇزەگە اسىرۋ ماسەلەسىن قاراستىرۋدى تاپسىرامىن. اتالعان باعدارلاما وقۋ، زەرتتەۋ جانە ستارتاپتاردى ازىرلەۋ ۇدەرىستەرى توعىساتىن ديناميكالىق ەكوجۇيەنى قالىپتاستىرۋعا ىقپال ەتۋگە ءتيىس. الەمنىڭ جەتەكشى ۋنيۆەرسيتەتتەرىنىڭ اكسەلەراتسيا تاجىريبەسىن قولدانعان دۇرىس. جاساندى ينتەللەكتتىڭ پايداسىن قازاقستاننىڭ ءاربىر تۇرعىنى ءبىلۋى كەرەك. ونىڭ نە ءۇشىن قاجەت ەكەنىن، قالاي دۇرىس قولدانىلاتىنىن ىجداھاتتىقپەن تۇسىندىرگەن ءجون، - دەدى پرەزيدەنت.

ۇكىمەتكە ازاماتتاردىڭ جاساندى ينتەللەكتتى كۇندەلىكتى قولدانۋىنا ارنالعان مەحانيزمدەردى ەنگىزۋ شارالارىن قابىلداۋ مىندەتى جۇكتەلدى.

- قازاقستاننىڭ يننوۆاتسيا مەن وزىق تەحنولوگيانى دامىتۋ ىسىندە كوش باستاۋعا مول مۇمكىندىگى بار. سيفرلاندىرۋ جانە جاساندى ينتەللەكتتى كەڭىنەن ەنگىزۋ ەلىمىزدىڭ قارىشتاپ دامۋىنا كەپىل بولۋعا ءتيىس. مۇنداي ءورشىل ماقساتقا قول جەتكىزۋگە قاۋقارىمىز جەتەدى. مەن وعان سەنىمدىمىن، - دەدى قاسىم-جومارت توقايەۆ.

وسىعان دەيىن پرەزيدەنتكە جاساندى ينتەللەكت سالاسىنداعى وتاندىق ونىمدەر تانىستىرىلعانى تۋرالى حابارلادىق.

ايدار وسپاناليەۆ

اۆتور

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى