ءبىز دوستارىمىزدىڭ تاۋەلسىزدىگىن قۇرمەتتەيمىز - ەممانيۋەل ماكرون
فرانسيا پرەزيدەنتى ەممانيۋەل ماكرون مەملەكەت باسشىسى قاسىم-جومارت توقايەۆپەن اقورداداعى كەزدەسۋىنەن كەيىنگى بىرلەسكەن مالىمدەمەدە مەملەكەتتەر اراسىنداعى قارىم-قاتىناستىڭ فرانسيالىق ۇلگىسى تۋرالى ايتتى، دەپ حابارلايدى Kazinform اگەنتتىگى.
«مەن سىزدەرگە ءتۇرلى ارەكەت يەلەرىنىڭ تاراپىنان ءتۇسۋى مۇمكىن قىسىمدى جەتكىلىكتى دەڭگەيدە باعالاماۋدان اۋلاقپىن. فرانسيا ءوزارا دوستىعىمىزدى جوعارى باعالايدى. ءبىز قارىم-قاتىناسىمىزدى نىعايتۋ باعىتىندا دوستىق جولىمەن ءجۇرىپ كەلەمىز. بۇل حالىققا قىزمەت ەتۋ جولىنداعى ءتۇرلى ەلدەرمەن بايسالدى قارىم-قاتىناستى قولدايتىن جول بولماق»، - دەدى ەممانيۋەل ماكرون.
سونداي-اق، فرانسيا باسشىسى مەملەكەتتەر اراسىنداعى قارىم-قاتىناستىڭ فرانسيالىق ۇلگىسى قانداي ەكەنىنە نازار اۋدارتتى.
«دوستىعىمىزدىڭ كەلەشەگى جارقىن بولاتىنىنا سەنەمىز. كەرەك كەزىندە دوستارىمىزدىڭ جاعىندا بولىپ، جانىنان تابىلامىز. ولاردىڭ تاۋەلسىزدىگىن قۇرمەتتەيمىز. ۇستەمدىك ورناتقىسى كەلەتىن نەمەسە ارەكەتىن بولجاپ بىلۋگە بولمايتىن دەرجاۆالار باردا ءدال وسىنداي فيلوسوفيالىق ۇستانىمى بار جاقسى دوستاردىڭ بولعانى ماڭىزدى»، - دەدى فرانسيا پرەزيدەنتى.
ەسكە سالايىق، فرانسيا پرەزيدەنتى مەملەكەت باسشىسى قاسىم-جومارت توقايەۆتىڭ شاقىرۋىمەن قازاقستانعا كەلدى.
ساپار اياسىندا ەكى ەل باسشىلارى ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.
ايتا كەتۋ كەرەك، قازاقستان پرەزيدەنتى قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.
