ءبىرىنشى سىنىپقا قۇجات قابىلداۋ 1-ساۋىردە باستالادى
استانا. KAZINFORM - بيىل ءبىرىنشى سىنىپقا ءوتىنىش قابىلداۋ 1-ساۋىردە باستالىپ، 2025 -جىلدىڭ 31-تامىزىنا دەيىن جالعاسادى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى ورتا ءبىلىم كوميتەتىنە سىلتەمە جاساپ.
ق ر «ءبىلىم تۋرالى» زاڭىنا سايكەس، 1-سىنىپقا اتا-اناسىنىڭ ءوتىنىشى بويىنشا بالالار 6 جاستان باستاپ قابىلدانادى. قۇجاتتاردى مەملەكەتتىك egov.kz ەلەكتروندىق ۇكىمەتى، جەرگىلىكتى اتقارۋشى ورگانداردىڭ اقپاراتتىق جۇيەلەرى ارقىلى، سونداي-اق قاعاز نۇسقادا 1-ءساۋىر - 31-تامىز ارالىعىندا تاپسىرۋعا بولادى.
قازاقستان ازاماتتارى ءۇشىن جالپى ءبىلىم بەرەتىن ورتا مەكتەپكە قابىلداۋعا قاجەتتى قۇجاتتار ءتىزىمى:
1) اتا-انانىڭ نەمەسە زاڭدى وكىلىنىڭ ءوتىنىشى؛
2) №065-ۋ نىسانىنداعى دەنساۋلىق جاعدايى تۋرالى انىقتاما جانە №052-2/ۋ نىسانىنداعى بالانىڭ دەنساۋلىق پاسپورتى؛
3) ولشەمى 3x4 س م سۋرەت (2 دانا)
شەتەل ازاماتتارى ءۇشىن: اتا- انالار نەمەسە باسقا زاڭدى وكىلدەر قازاقستاندا ۋاقىتشا نەمەسە تۇراقتى تۇرۋى كەرەك. شەتەلدىكتەر مەكتەپكە قازاقستان رەسپۋبليكاسىندا تۇراقتى تۇرۋ قۇقىعى تۋرالى جانە تۇرعىلىقتى جەرى بويىنشا تىركەۋ تۋرالى قۇجاتتاردى ۇسىنۋى كەرەك.
ءوتىنىش دەمالىس جانە مەرەكە كۇندەردى قوسپاعاندا، دۇيسەنبىدەن جۇماعا دەيىن قابىلدانادى.
- قۇرمەتتى اتا- انالار! قۇجاتتاردى تاپسىرۋدى سوڭعى كۇندەرگە قالدىرماي، بالاڭىزدى مەكتەپكە بەرۋدى الدىن الا ويلاستىرۋعا شاقىرامىز! - دەلىنگەن مينيسترلىك حابارلاماسىندا.
ايتا كەتەيىك، 2024-2025 وقۋ جىلىندا 351176 بالا 1-سىنىپقا قابىلداندى جانە ونىڭ 70 پايىزعا جۋىعى مەملەكەتتىك تىلدە وقۋعا نيەت ءبىلدىردى.
اۆتور
ەلميرا ورالبايەۆا
