ءبىرىنشى رەسپۋبليكالىق تەاترلار فەستيۆالىنىڭ باس جۇلدەگەرى انىقتالدى
اتىراۋدا داۋىلپاز اقىن، اقبەرەن باتىر ماحامبەت وتەمىس ۇلىنىڭ تۋعانىنا 200 جىل تولۋىنا وراي ءبىرىنشى رەسپۋبليكالىق تەاترلار فەستيۆالى قورىتىندىلاندى. ءبىر اپتاعا سوزىلعان فەستيۆالدىڭ باس جۇلدەسىن ماحامبەت اتىنداعى اكادەميالىق قازاق دراما تەاترى يەلەندى، دەپ حابارلايدى Kazinform.
فەستيۆالگە ىرىكتەۋدەن وتكەن 7 تەاتر قاتىستى. ولار - ماڭعىستاۋدان ن. ءجانتورين اتىنداعى مۋزىكالىق دراما تەاترى، جەزقازعاننان س. قوجامقۇلوۆ اتىنداعى قازاق مۋزىكالىق دراما تەاترى، اقمولا وبلىسىنان ش. قۇسايىنوۆ مۋزىكالىق دراما تەاترى، قوستانايدان ءى. وماروۆ اتىنداعى قازاق دراما تەاترى، شىمكەنتتەن ج. شانين اتىنداعى اكادەميالىق قازاق دراما تەاترى، باتىس قازاقستاننان ح. بوكەيەۆا اتىنداعى قازاق دراما تەاترى مەن جەرگىلىكتى ماحامبەت اتىنداعى اكادەميالىق قازاق دراما تەاترى.
ونەر ۇجىمدارىنىڭ قويىلىمىن باعالايتىن قازىلار القاسىنا قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى تۇڭعىشباي جامانقۇلوۆ جەتەكشىلىك ەتتى.
«ماحامبەت سوزدەرىنىڭ ءبارى دەرلىك - وتكىر، ادۋىندى. سول سەبەپتەن، ونەر دوداسى تارتىستى ءوتىپ، قويىلىمدار اسقان شەبەرلىكپەن ساحنالاناتىنىنا ۇمىتتەندىك»، - دەدى تۇڭعىشباي جامانقۇلوۆ.
ونەر دوداسىنىڭ شىمىلدىعى ماحامبەت اتىنداعى اكادەميالىق قازاق دراما تەاترىنىڭ تاكەن ءالىمقۇلوۆتىڭ «قوش بول، قاراوي» رەكۆيەمىن ساحنالاۋمەن باستادى. ءار تەاتردىڭ قويىلىمى وزىندىك ورنەگىمەن كورەرمەندى ءتانتى ەتتى.
قازىلار القاسىنىڭ شەشىمىمەن فەستيۆالدىڭ باس جۇلدەسى «قوش بول، قاراوي» رەكۆيەمىن ساحنالاعان اتىراۋ وبلىستىق ماحامبەت اتىنداعى اكادەميالىق قازاق دراما تەاترىنا بەرىلدى. «جۇبان» سپەكتاكلىن ۇسىنعان باتىس قازاقستان وبلىستىق ح. بوكەيەۆا اتىنداعى قازاق دراما تەاترى ءبىرىنشى جۇلدەگە لايىق دەپ تانىلدى. ەكىنشى ورىندى «ءاليحاننىڭ اماناتى» قويىلىمىمەن ن. ءجانتورين اتىنداعى ماڭعىستاۋ وبلىستىق مۋزىكالىق دراما تەاترى يەلەندى. ماحامبەت اتىنداعى ارنايى سىيلىقتى ءى. وماروۆ اتىنداعى قوستاناي وبلىستىق قازاق دراما تەاترى «الجير» قويىلىمىمەن جەڭىپ الدى.
سونداي-اق گاۋحار مانگۋلوۆا «ۇزدىك رەجيسسەر»، تەمىربەك مۇحتاروۆ «ۇزدىك سەنوگراف» اتاندى. ال «ۇزدىك ەر ادام بەينەسى» اتالىمىن مەدعات ومىراليەۆ، «ۇزدىك ايەل ادام بەينەسى» اتالىمىن نۇرلىگۇل جۇباتوۆا يەلەندى.
«ەكىنشى پلانداعى ەر ادام بەينەسى» اتالىمىنا راۋان تايماس، «ەكىنشى پلانداعى ايەل ادام بەينەسى» اتالىمىنا جىبەك ۇسەنوۆا يە بولدى. فەستيۆال سوڭىندا بىرنەشە قىزمەتكەر «مادەنيەت سالاسىنىڭ ۇزدىگى» توسبەلگىسىمەن ماراپاتتالدى.
ەسكە سالا كەتەلىك، بۇدان بۇرىن اتىراۋدا قۇرمانعازى اتىنداعى دومبىراشىلار بايقاۋىنىڭ جەڭىمپازى انىقتالعانىن جازعان ەدىك.
