ءبىرىڭعاي ۋاقىت بەلدەۋىنىڭ ادامعا اسەرىن زەرتتەۋ الگوريتمى قانداي

«عىلىم جانە تەحنولوگيالىق ساياسات تۋرالى» زاڭنىڭ 37-بابىنا سايكەس، باعدارلامالىق-ماقساتتى قارجىلاندىرۋ ستراتەگيالىق عىلىمي زەرتتەۋلەر جۇرگىزۋگە بولىنەدى جانە ول كونكۋرس نەگىزىندە جۇزەگە اسىرىلادى. «عىلىمي نەمەسە عىلىمي- تەحنيكالىق قىزمەتتى قارجىلاندىرۋ، عىلىمي ۇيىمداردى قارجىلاندىرۋ ەرەجەلەرىنىڭ» 45-تارماعىنا سايكەس، باعدارلامالىق- ماقساتتى قارجىلاندىرۋ اياسىندا عىلىمي- تەحنيكالىق تاپسىرمالار قۇزىرەتتى مەملەكەتتىك ورگان نەمەسە سالالىق قۇزىرەتتى ورگان تاراپىنان عالىمدار، ع ع ك مۇشەلەرى، عىلىم سالاسىنداعى ماماندار، مەملەكەتتىك ورگان وكىلدەرى، سالالىق مەملەكەتتىك ورگاندار وكىلدەرىنەن قۇرالعان جۇمىس توبى تاراپىنان ازىرلەنەدى. 2025-2027 -جىلدارعا ارنالعان باعدارلامالىق- ماقساتتى قارجىلاندىرۋ كونكۋرسى بويىنشا عىلىمي- تەحنيكالىق تاپسىرمالار بويىنشا عىلىم كوميتەتى جۇمىس توبىن قۇردى. ونىڭ قۇرامىنا ءارتۇرلى سالالار مەن سالالىق مەملەكەتتىك ورگاندار وكىلدەرى، سونىڭ ىشىندە ء«ومىر جانە دەنساۋلىق عىلىمى» باسىمدىعى بويىنشا قر دەنساۋلىق ساقتاۋ مينيسترلىگى وكىلدەرى كىردى»، - دەلىنگەن عىلىم مينيسترلىگىنىڭ Kazinform اگەنتتىگىنە بەرگەن جاۋابىندا.

ۆەدومستۆو مالىمەتىنشە، دەنساۋلىق ساقتاۋ مينيسترلىگى ستراتەگيالىق مەملەكەتتىك مىندەتتەردى شەشۋگە باعىتتالعان عىلىمي- تەحنيكالىق تاپسىرمالاردى ۇسىندى، ونىڭ ىشىندە ۋاقىتتى اۋىستىرۋ ماسەلەسى دە قاراستىرىلعان. دسم ۇسىنعان مالىمەتتەرگە سايكەس، ۋاقىت بەلدەۋىنە قاتىستى بىرنەشە ءوڭىر تۇرعىندارىنان كوپ شاعىم تۇسكەن.

«وسىعان بايلانىستى دسم ۋاقىتتى بىرىزدەندىرۋگە بايلانىستى پسيحيكالىق جانە فيزيكالىق دەنساۋلىققا اسەرىن زەرتتەۋ ءۇشىن دەرەكتەر بازاسىن عىلىمي نەگىزدەۋ ماقساتىندا عىلىمي- تەحنيكالىق تاپسىرما ازىرلەپ، جولدادى. بۇل عىلىمي زەرتتەۋدىڭ سالالىق مەملەكەتتىك ورگان ءۇشىن ماڭىزدىلىعىن ەسكەرە وتىرىپ، ۇسىنىستار جۇمىس توبىمەن قارالىپ، تۇزەتىلدى جانە ق ر ۇكىمەتىنىڭ جوعارى عىلىمي- تەحنيكالىق كوميسسياسىنىڭ (ج ع ت ك) قاراۋىنا ۇسىنىلىپ، 2025-2027 -جىلدارعا ارنالعان «ءومىر جانە دەنساۋلىق عىلىمى» باسىمدىعى بويىنشا ماقۇلداندى. ايتا كەتۋ كەرەك، ج ع ت ك قۇرامىندا ق ر دەنساۋلىق ساقتاۋ ءمينيسترى بار جانە بۇل ماسەلە اتالعان مەملەكەتتىك ورگان تاراپىنان قولداۋ تاپتى. ءوز كەزەگىندە ق ر عىلىم جانە جوعارى ءبىلىم مينيسترلىگى ج ع ت ك ماقۇلداعان عىلىمي-تەحنيكالىق تاپسىرمالار بويىنشا كونكۋرس قۇجاتتاماسىن ازىرلەپ، بەكىتەدى ءارى 2025-2027 -جىلدارعا ارنالعان باعدارلامالىق-ماقساتتى قارجىلاندىرۋ بويىنشا كونكۋرس جاريالايدى. بۇل ءىس-شارالار رەسپۋبليكالىق بيۋدجەت كوميسسياسىنىڭ شەشىمىمەن بەكىتىلگەن قاراجات اياسىندا جۇزەگە اسىرىلادى»، - دەپ كورسەتىلگەن مينيسترلىك اقپاراتىندا.

كونكۋرسقا عىلىمي- تەحنيكالىق قىزمەتتى جۇزەگە اسىراتىن اككرەديتتەلگەن سۋبەكتىلەر، سونداي-اق ءبىلىم بەرۋ سالاسىنداعى اۆتونومدى ۇيىمدار قاتىسا الادى. كونكۋرسقا ءوتىنىم بەرگەندە، ءوتىنىم بەرۋشى زەرتتەۋدىڭ ىسكە اسىرۋ كەزەڭى مەن قارجىلاندىرۋ سوماسىن كونكۋرس قۇجاتتاماسى تالاپتارىنا سايكەس ءوز بەتىنشە انىقتايدى.

- وسىعان قوسا، قارجىلاندىرۋ ەرەجەلەرىنىڭ 42-تارماعىنا سايكەس، عىلىمي جانە عىلىمي- تەحنيكالىق جوبالاردىڭ جۇزەگە اسىرىلۋ كەزەڭى اياقتالعاننان كەيىن، ۇلتتىق عىلىمي- تەحنيكالىق ساراپتاما ورتالىعى ءوز سايتىندا جوبالار تۋرالى اقپاراتتى جاريالايدى، بۇل 30 كۇنتىزبەلىك كۇن ىشىندە جۇزەگە اسىرىلادى، - دەپ ءتۇسىندىردى مينيسترلىك وكىلدەرى.

بۇدان بۇرىن حابارلانعانداي، بيىل قاراشا ايىندا قازاقستاندا ءبىرىڭعاي ۋاقىت بەلدەۋىنىڭ ادامدارعا اسەرى زەرتتەلەتىنى ءمالىم بولدى.

ۋاقىت بەلدەۋىن زەرتتەۋگە شامامەن 160 ميلليون تەڭگە جۇمسالماق.

جاقىندا، AMANAT مۇشەلەرى ۋاقىت بەلدەۋىنە قاتىستى زەرتتەۋدى ناۋرىزعا دەيىن اياقتاۋدى ۇسىندى.

پرەمەر-ءمينيستردىڭ ورىنباسارى سەرىك جۇمانعارين ءبىرىڭعاي ۋاقىت بەلدەۋىنىڭ ادامدارعا اسەرىن زەرتتەۋ ماسەلەسىنە قاتىستى پىكىر ايتتى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى