ءبىر جارىم جىل ىشىندە 45 مەدال يەلەنىپ، 8 رەت رەكورد ورناتتىم - باستاۋىش سىنىپ مۇعالىمى
استانا. قازاقپارات - وتانداسىمىز ايگۇل ەرجانوۆا جاقىندا مىسىر رەسپۋبليكاسىنىڭ استاناسى كايردە پاۋەرليفتينگتەن وتكەن اشىق الەم چەمپيوناتىندا توپ جاردى. الەمنىڭ 23 ەلىنەن كەلگەن اتلەتتەردەن باسىم تۇسكەن ول 100 كەلى زىلتەمىردى ەڭسەرىپ، قارسىلاس شاق كەلتىرمەدى. ءسويتىپ، الەم رەكوردىن جاڭارتىپ، 2 التىن مەدال قانجىعالاپ قايتتى.
ءبىر قىزىعى - ايگۇل تۇرعانباي قىزى جاستايىنان سپورتپەن اينالىسقان كاسىبي سپورتشى عانا ەمەس، سونىمەن قاتار، ول - ارداقتى ۇستاز. استانا قالاسىنداعى رايىمبەك باتىر اتىنداعى №50- «قازعارىش» مەكتەپ-ليتسەيىندە باستاۋىش سىنىپ مۇعالىمى بولىپ جۇمىس ىستەيدى. ۇستازدىق جولداعى ەڭبەك ءوتىلى وتىز جىلعا جۋىقتاعان. ال پاۋەرليفتينگپەن اينالىسقانىنا بار-جوعى ءبىر جارىم جىل عانا بولعان. بۇل سپورتقا كەلۋىنە تۋعان ءىنىسى سەبەپكەر بولىپتى.
«تۋعان ءىنىم ايبار - كاسىبي سپورتشى. سپورتتا جۇرگەنىنە - 20 جىل. ايبار - 8 ءتۇرلى سپورتتان چەمپيون. اۋىر اتلەتيكادان الەم، ازيا، ەۋروپا چەمپيوناتىن باعىندىرىپ، الەم رەكوردىن جاڭارتقان. 2021 -جىلى تەمىرجول لوكوموتيۆىنىڭ 276 توننا بولاتىن ۆاگونىن 10 مەترگە تارتىپ، گيننەس رەكوردتار كىتابىنا ەندى. ارقان تارتۋ، تاياق تارتۋ (ماس-رەستلينگ)، پاۋەرليفتينگتەن شاكىرت باپتاپ، ءتۇرلى جارىسقا الىپ بارادى. باۋىرىمنىڭ جەتىستىكتەرىن كورگەن سوڭ ءوز كۇشىمدى سىناۋعا بەل بۋدىم. بالا كۇنىمنەن ءوزىمنىڭ دە سپورتقا دەگەن قىزىعۋشىلىعىم زور ەدى. بۇرىن قالالىق، مەكتەپ ارالىق جۇگىرۋ، قول كۇرەس، ەستافەتا ويىندارى سياقتى سايىستارعا قاتىسىپ جۇرەتىنمىن. پاۋەرليفتينگكە ءبىر جارىم جىل بۇرىن عانا كەلىپ، شىنداپ كىرىستىم»، - دەيدى ايگۇل ەرجانوۆا.
ايگۇل ءبىر جارىم جىل ىشىندە ءتۇرلى جارىستان 45 مەدال الىپ، 8 رەت رەكورد جاڭارتقان. وسىلايشا ول «جۇمىس پەن سپورتتى قاتار الىپ ءجۇرۋ قيىن» دەگەندى جوققا شىعارعانىن ايتادى.
«باۋىرىم، ءارى باپكەرىم ءار جاتتىعۋ سايىن جاتتىعۋ تۇرلەرىن قيىنداتىپ، كەستە قۇرىپ، ءار جەتىستىگىمدى، ءار وزگەرىسىمدى باقىلاپ وتىردى. ءار جارىستان كەيىن كورسەتكىشتەرىمدى سالىستىرىپ، كەلەسى جارىسقا دايىندايتىن. اپتاسىنا ەكى-ءۇش رەت جاتتىعامىن. جاتتىعۋ تاڭعى ساعات جەتىدەن باستالىپ، ساعات 10:00-دە اياقتالادى. جۇمىستىڭ الدىندا دەمالىپ، ساباققا كەرەكتى كورنەكىلىك قۇرالدارىن دايىنداپ، وقۋشىلاردىڭ داپتەرىن تەكسەرۋگە، باسقا دا جۇمىستارعا ۋاقىت قالدىرامىن. ال سەنبى- جەكسەنبى كۇندەرى 5-6 ساعات جاتتىعامىن. سۇيىكتى ىسىمەن اينالىسقان ادامدا شارشاۋ، جالىعۋ، وكىنۋ دەگەن مۇلدە بولمايدى. دۇرىس تاماقتانىپ، جاقسى ۇيىقتاساڭ قاجەت كۇش-قۋاتتى جىلدام جيناپ الۋعا بولادى. شاقىرعان جارىستىڭ بارىنە بارا بەرمەيمىن. ويتكەنى مەكتەپتىڭ جۇمىسى جەتىپ ارتىلادى. بالالاردىڭ ءبىلىم دەڭگەيىنىڭ ءتۇسىپ كەتپەۋىن ەسكەرەمىن. جارىستار كوبىنە سەنبى-جەكسەنبى كۇنى بولاتىندىقتان جۇما كۇنگى ساباقتان كەيىن ۇشاقپەن بارىپ، ۇشاقپەن قايتامىن. دۇيسەنبى كۇنى ساباقتا بولامىن. «جۇمىس پەن سپورتتى قاتار الىپ ءجۇرۋ قيىن» دەپ سىلتاۋ ىزدەۋگە بولمايدى. الدىڭا ماقسات قويعاننان كەيىن كۇن ءتارتىبىن تۇزەيسىڭ. كۇن تارتىبىمەن جۇرگەننەن كەيىن ۋاقىتتى ءتيىمدى پايدالاناسىڭ. كەرىسىنشە، سپورتزالعا بارماعان كۇندەرى شارشاپ، قان اينالىمىم دۇرىس جۇرمەي، كوڭىل-كۇيىم ءتۇسىپ قالادى»، - دەيدى ايگۇل ءسوز سوڭىندا.
