ءبىر اي بۇرىن نوبەل سىيلىعىن العان نارگيز موحاممادي تۇرمەدە اشتىق جاريالادى
ءبىر اي بۇرىن نوبەل سىيلىعىن العان يراندىق قۇقىق قورعاۋشى نارگيز موحاممادي تۇرمەدە اشتىق جاريالادى. بۇل جايىندا ونىڭ وتباسى مالىمدەگەن، دەپ حابارلايدى Kazinform اگەنتتىگى BBC رەسۋرسىنا سىلتەمە جاساپ.
51 جاستاعى موحاممادي وزىنە جانە باسقا تۇتقىندارعا مەديتسينالىق كومەك كورسەتۋدەن باس تارتقانى، سونداي-اق حيدجاب كيۋگە مىندەتتەگەنىنە نارازىلىق ءبىلدىرىپ وتىر.
وتكەن اپتادا تۇرمە دارىگەرلەرى ونى ەمدەۋدەن باس تارتقان، ويتكەنى نارگيز موحاممادي شاشىن ورامالمەن جاپپاي قويعان.
ول ءبىر اپتا بويى تۇرمە بيلىگى مەن سوت ورگاندارىنا بىرنەشە رەت جۇگىنگەن، سوعان قاراماستان پروكۋرور موحاممادي حانىمدى ەمدەۋ ءۇشىن اۋرۋحاناعا اۋىستىرۋعا قارسى بولعان.
«ونىڭ جۇرەگى مەن وكپەسى سىرقات، ءبىراق پروكۋرور ونى اۋرۋحاناعا جاتقىزۋعا تىيىم سالدى» دەلىنگەن وتباسى حابارلاماسىندا.
تۇرمەدەگى سەنىمدى دارىگەردىڭ قويعان دياگنوزى مەن ەحوكارديوگرامماسىنا سايكەس، شۇعىل مەديتسينالىق كومەك كورسەتۋ ءۇشىن ونى كارديولوگيا ورتالىعىنا جاتقىزۋ كەرەك.
«اۋرۋحاناعا جاتقىزۋ ءۇشىن تۇتقىن ايەلدەردەن حيدجاب كيۋىن تالاپ ەتۋ ادامگەرشىلىككە جاتپايدى جانە مورالدىق تۇرعىدان ىسكە العىسىز»، - دەپ جاعدايعا الاڭداۋشىلىعىن ءبىلدىردى نوبەل كوميتەتىنىڭ ءتوراعاسى بەريت رەيسس-اندەرسەن.
يراننىڭ سوت ورگاندارى مەن تۇرمە بيلىگى وقيعاعاعا تۇسىنىك بەرگەن جوق.
يران ادام قۇقىقتارىن قورعاۋ ورتالىعىنىڭ ۆيتسە-پرەزيدەنتى نارگيز موحاممادي 13 رەت قاماۋعا الىنىپ، بەس رەت سوتتالعان جانە جالپى 31 جىلعا باس بوستاندىعىنان ايىرىلدى.
وعان سونداي-اق 154 دۇرە سوعۋ جازاسى تاعايىندالعان، ءبىراق ورىندالدى ما، جوق پا - بەلگىسىز.
