ءار وبلىستا بالالاردى پسيحولوگيالىق قولداۋ ورتالىقتارى اشىلادى

«قازىردىڭ وزىندە وتباسىلىق- تۇرمىستىق زورلىق- زومبىلىققا قاتىستى قۇقىقبۇزۋشىلىق تومەندەگەنى بايقالادى. دەگەنمەن، بۇل ماسەلەدە جاعداي ءالى دە كۇردەلى. جىل باسىنان بەرى وسىنداي فاكتىلەر بويىنشا پوليسياعا 74 مىڭنان استام ءوتىنىش كەلىپ تۇسكەن. اكىمشىلىك قاماۋعا الىنعاندار سانى 2 ەسەگە كوبەيدى. وڭىرلەردە وتباسىعا قولداۋ كورسەتەتىن 70 كە جۋىق ورتالىق قۇرىلدى. وندا زارداپ شەككەندەرگە مەديتسينالىق، پسيحولوگيالىق جانە قۇقىقتىق كومەك كورسەتىلەدى»، - دەدى ءا. سمايىلوۆ

الايدا ۇكىمەت باسشىسى بۇل ورتالىقتاردىڭ جەتكىلىكسىز ەكەنىن ايتتى. الداعى 3 جىلدا قوسىمشا وسىنداي 97 ورتالىق اشۋ كوزدەلىپ وتىر. قازىرگى ۋاقىتتا ولاردىڭ قىزمەتىن جۇيەگە كەلتىرۋ جۇمىستارى ءجۇرىپ جاتىر.

«بۇل ورتالىقتاردى ءتيىستى كادرلارمەن قامتۋ ماسەلەسىن دە شەشۋ قاجەت. تالداۋ كورسەتكەندەي، تۇرمىستىق قۇقىقبۇزۋشىلىقتاردىڭ جارتىسى ماس كۇيدە جاسالادى. ىشىمدىك ىشكەن بۇزاقىلار ءۇشىن ۋاقىتشا بەيىمدەۋ جانە دەتوكسيكاتسيا ورتالىقتارى مەن اكىمشىلىك قاماۋعا الىنعانداردى ارنايى قابىلداۋ ورىندارى جۇمىس ىستەيدى. ءبىراق، وندا دا ورىن تاپشىلىعى بار. تۇرمىستىق زورلىق- زومبىلىققا تاپ بولعان وتباسىلارعا جۇيەلى تۇردە پسيحولوگيالىق كومەك بەرۋ جۇمىستارى جۇرگىزىلمەيدى»، - دەدى پرەمەر- مينيستر.

ءا. سمايىلوۆ وقۋ- اعارتۋ مينيسترلىگىنە 2025 -جىلعا دەيىن ءار وبلىستا بالالارعا ارنالعان پسيحولوگيالىق قولداۋ ورتالىقتارىن اشۋ جوسپارىن ازىرلەۋدى تاپسىردى.

ءوڭىر اكىمدىكتەرى مادەنيەت، ىشكى ىستەر جانە دەنساۋلىق ساقتاۋ مينيسترلىكتەرىمەن بىرگە جاڭا وتباسىن قولداۋ ورتالىقتارىن، سونداي- اق ناركولوگيالىق مەكەمەلەردى اشۋدى قامتاماسىز ەتۋى قاجەت.

«دەنساۋلىق ساقتاۋ مينيسترلىگى پسيحوتەراپيەۆتەر مەن ناركولوگتاردى دايارلاۋعا ارنالعان مەملەكەتتىك تاپسىرىستى ۇلعايتۋ ماسەلەسىن پىسىقتاۋى كەرەك. ال ىشكى ىستەر، مادەنيەت مينيسترلىكتەرى تۇرمىستىق زورلىق- زومبىلىق ءۇشىن جاۋاپكەرشىلىكتى قاتاڭداتۋعا قاتىستى تۇزەتۋلەردى اۋقىمدى ءتۇسىندىرۋ جۇمىستارىن ۇيىمداستىرۋى قاجەت»، - دەدى ءا. سمايىلوۆ.

بۇعان دەيىن ق ر ىشكى ىستەر ءمينيسترىنىڭ ورىنباسارى يگور لەپەحا قازاقستاندا تۇرمىستىق زورلىق- زومبىلىق جازاسى قالاي كۇشەيتىلگەنىن ايتىپ بەرگەن ەدى.

سونداي- اق، تۇرمىستىق زورلىق- زومبىلىق ءىسى بويىنشا وتباسىلاردىڭ %43 ى سوتتا تاتۋلاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى