ءار سۋيتسيد بويىنشا قىلمىستىق ءىس قوزعالۋ كەرەك - اسحات ايماعامبەتوۆ
ءاربىر سۋيتسيد فاكتىسى بويىنشا قىلمىستىق ءىس قوزعاپ، تەرگەۋ جۇرگىزىلۋ كەرەك. ءماجىلىس دەپۋتاتى اسحات ايماعامبەتوۆ ادىلەت ءمينيسترى ازامات ەسقارايەۆتىڭ توراعالىعىمەن وتكەن ۆەدومستۆوارالىق كوميسسيا وتىرىسىندا وسىنداي ۇسىنىس ايتتى، دەپ حابارلايدى Kazinform.
وتىرىستان كەيىن ب ا ق وكىلدەرىنىڭ سۇراعىنا جاۋاپ بەرگەن اسحات ايماعامبەتوۆ ول ۇسىنىستىڭ ءمانىن ءتۇسىندىردى.
«قازىر ءبىز سۋيتسيدتەردىڭ ءبارى بويىنشا قىلمىستىق ءىس قوزعالا بەرمەيتىنىن كورىپ وتىرمىز. بۇل - پروبلەما. سوندىقتان ءبىز، بىرىنشىدەن، ءاربىر سۋيتسيد فاكتىسى بويىنشا قىلمىستىق ءىس قوزعاۋدى، ياعني تەرگەۋ جۇرگىزۋدى ۇسىنىپ وتىرمىز. ەكىنشىدەن، جاڭا ەكى قىلمىستىق قۇرام ۇسىنىلىپ وتىر. بۇل - سۋيتسيدكە يتەرمەلەۋ جانە سۋيتسيدتى ناسيحاتتاۋ»، - دەدى ول.
دەپۋتات بۇل باپتار بويىنشا دا جاۋاپكەرشىلىك ەنگىزۋ كەرەك دەگەندى ايتتى.
«سيني كيت» دەگەن سياقتى ونلاين پلاتفورمالارداعى دۇنيەلەردى ەستىگەن شىعارسىزدار. ب ا ق- تا سۋيتسيدتى ناسيحاتتاۋ جانە سۋيتسيدكە يتەرمەلەۋ تۋرالى مالىمەتتەر تاراپ جاتادى. ءبىز وسىنىڭ ءبارىن ايقىن رەتتەۋ كەرەك دەپ ەسەپتەيمىز. جاۋاپكەرشىلىك بولۋ كەرەك»، - دەدى اسحات ايماعامبەتوۆ.
استانا قالاسى قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆانىڭ مالىمەتى بويىنشا، بيىل استانادا 9 ايدا 83 جاس ءوسپىرىم سۋيتسيد جاساعان.
