ءانشى مەيرامبەك بەسبايەۆ ءوز راديوسىن اشپاق
قازاق ەستراداسىنىڭ جۇلدىزى مەيرامبەك بەسبايەۆ «ASpan FM» اتتى راديو اشادى. مۇنى Kazinform ءتىلشىسىنىڭ ساۋالىنا جاۋاپ بەرگەن جاڭا راديونىڭ ديرەكتورى ايمان نۇرازحان ءمالىم ەتتى.
«راديونى اشايىن دەپ جاتقانىمىز راس. ول - مەيرامبەكتىڭ راديوسى. 98.9 اۋە تولقىنىندا حابار تاراتادى»، - دەدى ايمان نۇرازحان Kazinform ءتىلشىنىڭ ساۋالىنا جاۋاپ بەرە وتىرىپ.
ونىڭ ايتۋىنشا، راديو اشۋ - مەيرامبەك بەسبايەۆتىڭ بالا كۇنگى ارمانى.
«مەيرامبەك بالا كۇنىنەن راديو اشۋدى ارمانداعان. ال، وعان «ASpan FM» دەگەن اتاۋدى اقىن قالقامان سارين بەردى»، - دەيدى ايمان نۇرازحان.
«ASpan FM» راديوسى 7-قاراشادان باستاپ حابار تاراتا باستايدى. قازىرگى تاڭدا اۋە تولقىنىندا قويىلاتىن اندەردى ىرىكتەۋ جۇمىسى ءجۇرىپ جاتىر.
«قازىر بىزدە سىناق جۇمىستارى ءجۇرىپ جاتىر. ارينە، ءبىرىنشى كەزەكتە قازاقتىڭ مۋزىكاسى قويىلادى. ونىڭ ىشىندە جاڭادان شىعىپ جاتقان جاستاردىڭ اندەرى بەرىلەدى. ال راديونىڭ حابارلارى بويىنشا ماسەلە - ءالى قۇپيا. ءبىراق ءبىز ساياساتتى قوزعامايمىز. مۇندا باسىمدىق مۋزىكاعا بەرىلەدى»، - دەدى ا. نۇرازحان.
اۆتور
ءاليحان اسقار
