عالىمداردىڭ بازالىق جالاقىسى جىل سايىن 20 پايىزعا كوتەرىلەدى - ساياسات نۇربەك
عالىمداردىڭ بازالىق جالاقىسى جىل سايىن 20 پايىزعا كوتەرىلەدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى Kazinform.
«سوڭعى 20 جىلدا عالىمدارىمىزدىڭ سانى 22 مىڭعا ەندى جەتتى. عالىمدار قارتايىپ بارادى. عىلىمي- زەرتتەۋ ينستيتۋتتارى باسشىلارىنىڭ ورتاشا جاسى - 59 جاس. ۇلتتىق عىلىم اكادەمياسى مۇشەلەرىنىڭ ورتاشا جاسى - 69 جاس. جاستار جامان ەمەس. سوڭعى 5 جىلدا جاستار عىلىمعا كەلە باستادى. قازىرگى تاڭدا 40 جاسقا دەيىنگى عالىمداردىڭ سانى 46 پايىزعا جەتىپ وتىر. دەمەك، 22 مىڭ عالىمنىڭ 46 پايىزى - 40 جاسقا دەيىنگى جاستار. قورقاتىنداي جاعداي جوق. جاستار بىرتىندەپ عىلىمعا كەلىپ جاتىر»، - دەدى مينيستر Jibek Joly تەلەارناسىنىڭ «ۋادە» باعدارلاماسىنا بەرگەن سۇحباتىندا.
وسى رەتتە ول عالىمداردى الەۋمەتتىك قولداۋ ءىس- شارالارىنا توقتالدى.
«وتكەن جىلدىڭ قىركۇيەك ايىندا 1700 جەتەكشى عالىمنىڭ جالاقىسىن بىردەن 70 پايىزعا وسىردىك. ولار - پروفەسسورلار، ۇلكەن ۇجىمداردى باسقارىپ وتىرعاندار جانە عىلىمي جوبالارعا بەلسەندى قاتىساتىن عالىمدار. وسى جىلدان باستاپ جىل سايىن عالىمداردىڭ، پروفەسسورلاردىڭ، وقىتۋشىلاردىڭ جالاقىسىن 20 پايىزعا وسىرۋگە شەشىم قابىلدادىق. وتكەن جىلدارى جالاقى جوعارى وقۋ ورىندارىنىڭ، عىلىمي ينستيتۋتتاردىڭ ەسەبىنەن وسىرىلەتىن. ياعني، مينيسترلىك ولارعا قىركۇيەكتەن باستاپ جالاقىنى 15, 12 پايىزعا كوتەرۋ تۋرالى حات جىبەرەتىن. ءبىراق، ولاردىڭ جالاقىنى كوتەرۋگە جاعدايى بولمايتىن. ۇكىمەت ءبىزدى قولدادى. بيىلدان باستاپ 20 پايىزدى رەسپۋبليكالىق بيۋدجەتتەن بولەمىز. دەمەك، بازالىق جالاقى جىل سايىن 20 پايىزعا ءوسىپ وتىرادى»، - دەدى ساياسات نۇربەك.
