عالىمدار 5700 جىلعا جەتەتىن «ماڭگى باتارەيا» جاساپ شىعاردى
استانا. قازاقپارات - عالىمدار قۋاتتاماستان مىڭداعان جىل جۇمىس ىستەي الاتىن جاڭا ۇرپاق باتارەياسىن تانىستىردى. جاڭا تەحنولوگيانىڭ نەگىزىندە راديواكتيۆتى كومىرتەك-14 جاتىر، ءبىراق ازىرلەۋشىلەر بۇل قۇرىلعىنىڭ قاۋىپسىز ەكەنىن جانە رادياتسيانىڭ سەنىمدى تۇردە ونىڭ قابىعىندا وقشاۋلانعانىن ايتادى.
باتارەيانىڭ ولشەمى نەبارى 1x1 س م بولعانىمەن، ونىڭ قۋاتى عاسىرلارعا جەتەدى. عالىمداردىڭ ايتۋىنشا، قۇرىلعى 5700 جىل بويى ۇزدىكسىز جۇمىس ىستەي الادى. بۇل باتارەيكانى ازىرلەۋ كەزىندە يادرولىق قالدىقتاردى قايتا وڭدەۋ تەحنولوگياسى قولدانىلعان، بۇل ونى ەكولوگيالىق تۇرعىدان دا ماڭىزدى جاڭالىققا اينالدىرادى.
ماڭگىلىك باتارەيكالاردىڭ نەگىزگى ماقساتى - ۇزاق مەرزىمدى قۋات كوزى قاجەت ەتەتىن قۇرىلعىلارعا ەنەرگيا بەرۋ. ماسەلەن، ولاردى عارىشتىق زەرتتەۋلەردە، مەديتسينالىق يمپلانتتاردا (مىسالى، كارديوستيمۋلياتورلاردا) نەمەسە شالعاي جانە قيىن قولجەتىمدى ايماقتاردا پايدالانۋعا بولادى.
باتارەيكانى جاساۋشىلاردىڭ ايتۋىنشا، ونىڭ قاۋىپسىزدىك دەڭگەيى جوعارى. قابىق رادياتسيانىڭ سىرتقا شىعۋىنا مۇمكىندىك بەرمەيدى، ال ىشىندەگى كومىرتەك-14 تابيعي ىدىراۋ ارقىلى ەنەرگيانى باياۋ جانە تۇراقتى تۇردە وندىرەدى.
بۇل يننوۆاتسيا ەنەرگيا ساقتاۋ سالاسىندا توڭكەرىس جاساۋعا قابىلەتتى جانە بولاشاقتا كوپتەگەن سالانى وزگەرتۋى مۇمكىن. عالىمدار وسىنداي باتارەيكالار ەنەرگەتيكا مەن ەكولوگيا سالاسىنداعى جاڭا مۇمكىندىكتەردى اشاتىنىنا سەنىمدى.
