ءاليحان سمايىلوۆ ەكونوميكا ءوسىمىن قامتاماسىز ەتۋ جوسپارىن ايتتى

«ۇلتتىق قور بولاشاق ۇرپاققا ارنالعان. پرەزيدەنت ۇلتتىق قوردىڭ ۆاليۋتالىق اكتيۆتەرىن 2030-جىلعا قاراي 100 ميلليارد ا ق ش دوللارىنا دەيىن جەتكىزۋ مىندەتىن قويىپ وتىر. الايدا 2021-جىلدىڭ باسىندا قورداعى قاراجات 67 ميلليارد دوللار بولسا، قازىر 60 ميلليارد دوللارعا دەيىن تۇسكەن. 2024-جىلدىڭ ءبىرىنشى قاڭتارىنان باستاپ مەملەكەت باسشىسىنىڭ تاپسىرماسىنا سايكەس ۇلتتىق قوردىڭ ينسۆەستيتسيالىق تابىسىنان بالالارعا قاراجات اۋدارىلا باستايدى، ياعني بۇل باعىتتا پارلامەنت ءتيىستى زاڭدى قابىلدادى. وسى ورايدا حالىقتىڭ ۇلتتىق قورعا دەگەن نازارى ەرەكشە بولادى، ويتكەنى ءار اتا-انا بالالارىنا قوردان قانشا اقشا تۇسكەنىن كۇتىپ وتىرادى. سوندىقتان بولاشاقتا وسى قوردان قاراجات الۋدى توقتاتۋىمىز كەرەك»، - دەدى ءماجىلىس دەپۋتاتى نۇرتاي سابيليانوۆ.

ءوز كەزەگىندە ۇكىمەت باسشىسى ءاليحان سمايىلوۆ 2024-جىلى ۇلتتىق قوردان تارتىلاتىن نىسانالى ترانسفەرتتىڭ كولەمى 1,6 تريلليون تەڭگەنى قۇرايتىنىن ايتتى.

«ولار الەۋمەتتىك ماڭىزى بار جانە ستراتەگيالىق ينفراقۇرىلىمداعى جوبالاردى قارجىلاندىرۋعا باعىتتالعان. سونىمەن قاتار، ۇلتتىق قوردان تارتىلاتىن قاراجات، نىسانالى ترانسفەرتتەر جىل سايىن ازايادى. ونىڭ ورنىن رەسپۋبليكالىق كىرىستەر تولتىرادى. ول ءۇشىن ءتيىستى ينۆەستيتسيالاردى تارتىپ، ناقتى سەكتوردى قارجىلاندىرۋ ماسەلەلەرىن شەشەمىز. بۇل قادامدار مەملەكەتتىك قولداۋ ءىس-شارالارى ارقىلى، ياعني شاعىن جانە ورتا بيزنەستى قولداۋ، اگروونەركاسىپ كەشەنىن قارجىلاندىرۋ اياسىندا ىسكە اسىرىلادى. قازىر 32 تريلليون تەڭگەنى قۇرايتىن 970 ءىرى ينۆەستيتسيالىق جوبانى جۇزەگە اسىرىپ جاتىرمىز»، - دەدى پرەمەر-مينيستر.

ونىڭ سوزىنە قاراعاندا، بارلىق جوبانى ىسكە قوسۋ ءۇشىن ينفراقۇرىلىمدى جاڭعىرتۋ كەرەك.

«سول ءۇشىن «تاريفتى ينۆەستيتسياعا ايىرباستاۋ» باعدارلاماسىن جۇزەگە اسىرىپ جاتىرمىز. تاريفتەردىڭ ەسەبىنەن سۋمەن، جىلۋمەن، گازبەن، ەلەكتر قۋاتىمەن جابدىقتاۋ جەلىلەرىنە 3 تريلليون تەڭگەدەن استام قاراجات تارتىلادى. بۇل ينفراقۇرىلىمدى جاڭعىرتۋ - ناقتى سەكتور سالالارىنا تىكەلەي وڭ اسەرىن بەرەدى. جالپى، كەلەر جىلدارى ەكونوميكالىق ءوسىم قارقىنى جوعارىلايدى. بيىل 4,7 پايىز بولسا، كەلەر جىلى 5,3 پايىز شاماسىندا بولادى. 2026-جىلعا دەيىن 6 پايىزعا دەيىن وسەدى دەپ ەسكەرىپ وتىرمىز. ول ءۇشىن رەسپۋبليكالىق بيۋجەت كىرىستەرىن كوبەيتۋ بويىنشا ەكونوميكانى نىعايتۋىمىز كەرەك. ەكىنشىدەن، كەدەندىك ءارى سالىق سالاسىنداعى اكىمشىلەندىرۋدى جاقسارتۋ ماڭىزدى. جالپى، «كولەڭكەلى» ەكونوميكانى ازايتۋعا ەرەكشە ەكپىن قويىلىپ وتىر»، - دەدى ءاليحان سمايىلوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى