ءاليحان سمايىلوۆ اسىل تۇقىمدى مال ساۋداسىنداعى كۇماندى سحەمانى اشىپ ايتتى
استانا. KAZINFORM - جوعارى اۋديتورلىق پالاتانىڭ ءتوراعاسى ءاليحان سمايىلوۆ ءماجىلىس دەپۋتاتتارىنىڭ سۋبسيديالارعا جاسالعان اۋديتتىڭ قورىتىندىسىن ءتۇسىندىرۋ كەزىندە اسىل تۇقىمدى مال ساۋداسىنداعى كۇماندى سحەمانى اشىپ ايتتى.
- راسىمەن دە وسىدان 1-2 -جىل بۇرىن ۇكىمەت كورشى ەلدەرگە ءتىرى مالدى ەكسپورتتاۋعا ۋاقىتشا شەكتەۋ قويدى. ونىڭ نەگىزگى سەبەبى - كورشى ەلدەرگە اسىل تۇقىمدى مال ساتۋ كولەمى كۇرت ءوسىپ كەتكەن. ياعني، شارۋاشىلىقتار اسىل تۇقىمدى مال ساتىپ الادى، وعان سۋبسيديا الادى. ول سودان كەيىن كورشى ەلدەرگە ارزان باعامەن ساتادى. سوندىقتان بۇل ءۇردىستى توقتاۋ ءۇشىن ۋاقىتشا شەكتەۋ قويىلعان ەدى، - دەدى پالاتا باسشىسى.
ءاليحان سمايىلوۆ ەكسپورتتى شەكتەۋ شارالارى وڭدەۋ ونەركاسىبىن ىنتالاندىرۋ ءۇشىن قابىلداناتىن تەتىك ەكەنىن دەپۋتاتتاردىڭ ەسىنە سالدى.
- مىسالى، كۇنباعىس داقىلىنىڭ اينالىمىن دا ءبىز ەكسپورتتىق باج ارقىلى ءبىرشاما شەكتەدىك. سونىڭ ناتيجەسىندە قازىر ىشكى نارىقتاعى كۇنباعىس داقىلىنىڭ وڭدەلۋ دەڭگەيى كۇرت ءوستى. ءبىز شيكىزاتتى عانا ەمەس، وڭدەلگەن تاۋارلاردى دا ەكسپورتتاۋىمىز كەرەك. سوعان جاعداي جاساۋىمىز كەرەك، - دەدى ءاليحان سمايىلوۆ.
