ءادىل عالياحمەتوۆ: قارسىلاستارىمىزدان قورىقپايمىز

سپورتشىنىڭ سوزىنشە، بۇگىنگى جارىس كۇنى جەڭىل ءارى وتە جاقسى ناتيجەگە تولى بولعان.

- بۇگىنگى جارىس ءساتتى بولدى، بارلىعىمىز كەلەسى كەزەڭگە وتتىك. كوڭىل كۇيىم وتە تاماشا. جارىستار جەڭىل ءارى جاقسى ءوتتى، ناتيجەلەر كوڭىلدەن شىعادى، - دەدى ول.

عالياحمەتوۆ قۇرامانىڭ 2000 مەترگە ارالاس كوماندالىق ەستافەتا كەزىندە تاپ بولعان قيىندىق تۋرالى ايتتى.

- الينا جارىس كەزىندە قۇلاپ قالدى. ونداي جاعداي مۇزعا نەمەسە كونكيگە بايلانىستى بولىپ تۇرادى. جارىس شارتىنا بايلانىستى ەستافەتانى كەلەسى ايەل سپورتشى عانا قابىلداي الادى. يانا ءتورت اينالىم جۇگىرىپ، قازاقستان كومانداسى فينالعا جولداما الدى، - دەدى سپورتشى.

سونداي- اق، شورت-ترەكشى فينالداعى قارسىلاستارىنان قورىقپايتىنىن، التىن مەدال ءۇشىن كۇرەسەتىنىن باسا ايتتى.

- فينالعا ەڭ مىقتى كوماندالار جينالدى. كورەيا جانە قىتاي قۇراماسىنىڭ ساپىندا وليمپيادا چەمپيوندارى جانە الەمدىك رەيتينگىدە الدىڭعى ورىندا ءتۇرعان سپورتشىلار بار. الايدا ءبىز قورىقپايمىز، التىن مەدال ءۇشىن بار كۇشىمىزدى سالامىز، - دەيدى عالياحمەتوۆ.

ايتا كەتەيىك، قىتايدىڭ حاربين قالاسىندا ءوتىپ جاتقان IX قىسقى ازيا ويىندارىنىڭ شورت- ترەكتەن العاشقى جارىس كۇنى ءوز مارەسىنە جەتتى.

قورىتىندىسىندا، 1500 مەترگە سىرعاناۋ بويىنشا 6 سپورتشى (3 ايەل جانە 3 ەر) جارتىلاي فينالعا، 500 مەتر جانە 1000 مەترگە سىرعاناۋدان 6 سپورتشىدان (3 ايەل جانە 3 ەر) كەلەسى كەزەڭگە ءوتتى.

سونىمەن قاتار، قازاقستان قۇراماسى 2000 مەتردەن ارالاس كوماندالىق ەستافەتا بويىنشا فينالعا جولداما الدى.

مۇحتار قاليموللا ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى