«ءابىش - قۇدايعا، جۇمەكەن - پايعامباردان»: كەكىلباي ۇلىنا ارناعان قالامگەرلەر قولتاڭباسى
استانا. قازاقپارات - 2018 -جىلى ق ر ۇلتتىق اكادەميالىق كىتاپحاناسىندا قازاقستاننىڭ حالىق جازۋشىسى، مەملەكەت جانە قوعام قايراتكەرى ءابىش كەكىلباي ۇلى اتىنداعى وقۋ زالى اشىلعان بولاتىن.
ءا. كەكىلباي ۇلى كىتاپحاناسى-ەڭ باي كىتاپحانالاردىڭ ءبىرى بولىپ سانالادى. بۇل زال قورىندا جازۋشىنىڭ كىتاپحانا كوللەكسياسىنان ىرىكتەلگەن ادامزات تاريحىنا ارنالعان مادەنيەت جانە ونەر تاريحى تۋرالى باسىلىمدار، پلانەتانىڭ ۇلى تۇلعالارى تۋرالى كىتاپتار، قازاقستاننىڭ اقىندارى مەن جازۋشىلارىنىڭ كىتاپتارى، البومدار مەن اتلاستار، قازاقستاننىڭ گەوگرافياسى مەن تاريحى جانە ونىڭ شاعىن وتانى - ماڭعىستاۋداعى الماناحتار مەن كوپتەگەن قىزىقتى باسىلىمدار بار.
«ءابىش الەمى» زالىنان ءبىزدىڭ نازارىمىزعا «قالامگەر قولتاڭباسى» كىتابى ءىلىندى. بۇل جيناقتا ءابىش كەكىلباي ۇلى جەكە كىتاپحاناسىنىڭ قورىنداعى ادەبيەت الەمىنە تانىمال قالامگەرلەردىڭ قولتاڭبالارى توپتاستىرىلعان ەكەن. بۇگىن سىزدەردىڭ نازارلارىڭىزعا اتى اڭىزعا اينالعان قازاقتىڭ كورنەكتى جازۋشىلارىنىڭ ءابىش كەكىلباي ۇلىنا ارناپ جازعان قولتاڭبالارىن ۇسىنامىز.
«عۇلاما جازۋشى، كورنەكتى مەملەكەت قايراتكەرى ءابىش كەكىلبايەۆ - اعا - تەڭىز تەرەڭىندەي قۇرمەتپەن! قاسىم- جومارت توقايەۆ. 24.11.07.»
«ءابىش! مەندەي جازعاندى سەندەي ءتۇسىنىپ، سەندەي جازعاندا مەندەي قۋانسا عوي جۇرتىڭ.. . قادىر مىرزا. 09.12.73-جىل.»
«ءابىش - قۇدايعا، جۇمەكەن - پايعامباردان. جۇمەكەن ناجىمەدەنوۆ. 15/8.67.»
«جانىم ءابىش،
جىگىت بولدىڭ ەڭسەلى،
جىلىس قۇرار وردالى دا كەڭسەلى.
ءومىر باقي جاقسى كورىپ وتەرمىن،
جۇرەگىمنىڭ كۇشى جەتسە مەن سەنى!
نەگە؟ نە ءۇشىن؟ ونى جاقسى بىلەسىڭ،
بۇل ۋاقىتتا مول عوي سالعان ۇلەسىڭ.
اقىلىمنىڭ ايناسىندا جىلتىلداپ،
جۇرەر ۇزاق ءابىش - دەگەن ءبىر ەسىم!
اعاڭ عافۋ. 18.11.90».
«اللانىڭ نۇرى جاۋعان، جۇرەك شامى جارقىراپ جانعان، تاعدىرىمنىڭ تەمىرقازىعى - قادىرلى ابەكەمە تاۋەلسىزدىك تايفۋنى تۋرالى رومانىمدى ۇسىنامىن! دۇكەنباي. استانا، 17-جەلتوقسان 2005».
«بۇگىنگى قازاق ادەبيەتىنىڭ كەمەڭگەرى ابەكەڭە (ابىشكە) «جازعانىڭ كىل كلاسسيكا بولسىن، وقيتىنىڭ ءبىزدىڭ كىتاپ بولسىن» دەگەن جالعىز تىلەكپەن. مارال. 24.03.1980.
«ابەكە! «... سەنى ايداھار جۇتۋدى ويلاعاندا، بۇل قازاقتى قىزعىشتاي قورعادىڭ- اۋ. نايزاعايلار توبەڭدە ويناعاندا، جايتارتقىشىڭ، داريعا، بولمادىم- اۋ...» اۆتور سەمياسىنان. 6.12.1979». م. ساتىبالديەۆ.
«ءابىش!
دەي الدىم با بىردەمە، دەمەدىم بە؟!
دەي الماسام، بوعىمدى جەگەنىم دە.
وكپە نازىم، قايعى مەن قۋانىشىم،
تۇرسا ءبارى جارادى ولەڭىمدە...
م. ماقاتايەۆ. 23.03.68 ج.»
«ابىشكە - ءبىزدىڭ قولدان كەلەرى - وسى عانا. 20.01.1997» م. ماعاۋين.
«قازاقتىڭ دارا پەرزەنتى، ءوزىم ۇلكەن دارىنىن، ازاماتتىعىن ەرەكشە قادىرلەيتىن ابەكەڭە وزگەشە. 27.12.96» . م. شاحانوۆ.
«قۇرمەتتى ءابىش، كلارا! وزدەرىڭە دەگەن اعانىڭ اق تىلەگىنىڭ بەلگىسى بولسىن! قۇدايدىڭ بۇيىرعان باقىتى باياندى، دەنساۋلىقتارىڭ جاقسى، تىلەۋلەرىڭ ءارقاشان قابىل بولۋىنا تىلەكتەس كوڭىلدەن. 15.09.2015». سەرىك قيرابايەۆ.
«ابىشكە!
ادام بالاسىنىڭ باسىندا بولۋى مۇمكىن جاقسىلىقتىڭ ءبارىن ىشتەي تىلەپ، وزىڭە «ۇرسىپ» جۇرەتىن فاريزادان. 1979, نويابر,23.» فاريزا وڭعارسىنوۆا.
«بار جيعان- تەرگەنىم اۋەلى اللاعا، سودان سوڭ وزىڭە امانات دەيتىن بىرەگەيىمنىڭ ءبىرى ءابىشجان! سەن بۇنى ساعىنار كۇندەردىڭ بەلگىسىندەي سارعايىپ جاراتىلعان ەكەن دەپ تە ساقتاعايسىڭ. ال، بۇگىندەرى بۇل قينالماي قىزمەت كورسەتۋىڭە تاتىسا اپەندە اعاڭدا ارمان قايسى؟ ! زور قۇرمەتپەن 14.03.1994» حاميت ەرعاليەۆ.
«ءابىش باۋىرىم! دۇنيەدەگى ەڭ اسىلىڭ اناڭ عوي. سول قاسيەتتى اناڭنىڭ اماندىعىن تىلەيمىن! 30.08.97». شەرحان مۇرتازا.
«قارشاداي كەزىمىزدەن اعالىق جولىنان جازباي، قارا ورمان قازاقتىڭ ءسوزى مەن ويىنىڭ جۇگىن قارا نارداي ارقالاپ، ارىستار مەن الىپتار جولىن جاعالاپ كەلە جاتقان ۇلتتىڭ ۇلى پەرزەنتى - ابەكەڭە (ءابىش كەكىلباي ۇلىنا)! ىنىلىك ىزەتپەن نۇرلان ورازالين. 18.01.2014. استانا»
«بىلمەيمىن - قايشىلىق پا، كەلىسىم بە،
ايتەۋىر، دارا بىتكەن كوپ ىشىندە.
ساقتاي گور وسى ادامدى، ۋا، جاراتقان،
كەرەك ول مەن ءۇشىن دە، ەل ءۇشىن دە.
و، ساقتا قارا نارداي سابىرىمدى،
ماڭدايعا سيىپ تۇرعان دارىندى ۇلدى.
وزىڭدەي ماڭقىستاۋدىڭ ماڭعازىمدى،
كوزىندەي بۇرىنعىنىڭ قادىرلىمدى، - دەپ تىلەيتىن «جامان» ءىنىڭىزدىڭ كىتابى بۇل.
ەسەنعالي راۋشانوۆ. 22.09.88»
وسى قول جازبالارداعى ىستىق ىقىلاستىڭ وزىنەن ءابىش كەكىلباي ۇلىنىڭ ارىپتەستەرى اراسىندا ۇلكەنگە ءىنى، كىشىگە اعا بولا بىلگەن سىيىمدىلىعىن كورۋگە بولادى. قازاق جازۋشىلارىنىڭ ءبىر- بىرىنە دەگەن جىلى لەبىزدەرىن كورە وتىرىپ، ۇلىلاردىڭ بەرەكە-بىرلىگى بۇگىنگى جاستارعا ۇلگى بولسا دەيمىز.
اۆتور
ريزابەك نۇسىپبەك ۇلى
