ءابىش كەكىلبايەۆتىڭ ەش جەردە جاريالانباعان ولەڭدەرى جارىق كوردى
استانا. KAZINFORM - ءابىش كەكىلبايەۆتىڭ 85 جىلدىعى قارساڭىندا قالامگەردىڭ بۇعان دەيىن ەش جەردە جاريالانباعان ولەڭدەرى جيناقتالعان «داۋرەن كەشكەن» كىتابى جارىق كوردى، - دەپ حابارلايدى «قازاقستان» تەلەارناسى.
بۇل مەملەكەت جانە قوعام قايراتكەرىنىڭ ءۇشىنشى جىر كىتابى دەۋگە بولادى. شىعارمالارى جازۋشىنىڭ جەكە مۇراعاتىندا ساقتالىپتى. وندا بۇرىنعى گازەتتەردە جاريالانىپ، جيناقتارعا ەنبەگەن ولەڭدەرى مەن باللادالارى بار. سونىمەن بىرگە تۇرىك تىلىندە جارىق كورگەن «KUY» كىتابى دا تانىستىرىلدى.
شارا بارىسىندا «ءابىش كەكىلبايەۆ الەمى» اتتى فوتو جانە كىتاپ كورمەسى ۇيىمداستىرىلدى. وعان 150 گە جۋىق ەڭبەك قويىلدى. اراسىندا جازۋشىنىڭ قولجازبالارى، پۋبليتسيستيكالىق ماقالالارى، كىتاپتارى، زيالىلاردىڭ قالامگەر تۋرالى ايتقان ەستەلىكتەرى بار.
«ءبىز عىلىم جانە جوعارى ءبىلىم مينيسترلىگىنىڭ گرانتتىق قارجىلاندىرۋ جوباسى اياسىندا سول ولەڭدەردى جيناستىرىپ، جاڭا كىتاپ قىلىپ، «داۋرەن كەشكەن» دەگەن اتپەن ۇسىنىپ وتىرمىز. بۇعان بىزگە جازۋشىنىڭ نەمەرەسى، جازۋشىنىڭ كوركەم مۇرالارىنىڭ جاناشىرى ابىل كەكىلبايەۆ باۋىرىمىز كوپ كومەكتەستى»، - دەدى كىتاپ قۇراستىرۋشى ادىلەت قابىلوۆ.
