بيىلعى 10 ايدا ەلىمىزدە جەمقورلىققا قاتىستى 1500 گە جۋىق قىلمىس تىركەلگەن
مەملەكەت باسشىسى سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اسحات جۇماعاليدى قابىلدادى، دەپ حابارلايدى Kazinform اقوردانىڭ رەسمي سايتىنا سىلتەمە جاساپ.
پرەزيدەنتكە سىبايلاس جەمقورلىققا قارسى قىزمەتتىڭ بيىلعى 10 ايدا اتقارعان جۇمىسىنىڭ ناتيجەلەرى جونىندە باياندالدى.
وسى ۋاقىت ىشىندە ەلىمىزدە جەمقورلىققا قاتىستى 1500 گە جۋىق قىلمىس تىركەلىپ، 1100 دەن استام ادامنىڭ ءىسى اشكەرەلەندى. ونىڭ 158 ءى ءتۇرلى دەڭگەيدەگى باسشىلار.
سوتقا مىڭنان استام ءىس جولدانىپ، 282 ميلليارد تەڭگە شىعىن وتەلدى.
سونىمەن قاتار اگەنتتىك ءتوراعاسى 2022 -جىلدان بەرى بيۋدجەتكە جانە كۆازيمەملەكەتتىك سەكتور سۋبەكتىلەرىنە قۇنى شامامەن 857 ميلليارد تەڭگە بولاتىن مۇلىك اكتيۆتەرى مەن قارجى قايتارىلعانىن ايتتى.
پرەزيدەنتكە ءبىرقاتار قىلمىستىق ءىستى تەرگەۋ امالدارىنىڭ بارىسى جونىندە مالىمەت بەرىلدى.
بۇدان بولەك، اسحات جۇماعالي مەملەكەت باسشىسىنا جەمقورلىقتىڭ الدىن الۋ جۇمىستارى تۋرالى ەسەپ بەردى.
سىبايلاس جەمقورلىق تاۋەكەلدەرى كارتاسىن جۇزەگە اسىرۋ اياسىندا تاپسىرىلۋ مەرزىمى كەشىكتىرىلگەن، قارجى جىمقىرۋ قاۋپى بار الەۋمەتتىك نىساندار قۇرىلىسىنا مونيتورينگ جۇرگىزىلىپ جاتىر. اگەنتتىك ەلىمىزدىڭ بارلىق ءوڭىرى بويىنشا جالپى بيۋدجەتى 2,44 تريلليون تەڭگەنى قۇرايتىن وسىنداي 156 نىسان بار ەكەنىن انىقتاعان.
ازاماتتىق قوعاممەن ءوزارا تىعىز قارىم- قاتىناس ورناتۋ ارقىلى «سىبايلاس جەمقورلىققا قارسى ۆولونتەرلىك» جوباسى ىسكە اسىرىلۋدا. قازىرگى ۋاقىتتا جەمقورلىقتىڭ بەلەڭ الۋىنا بەي- جاي قارامايتىن 2 مىڭنان استام ازامات بۇل باستاماعا اتسالىسىپ جاتىر.
كەزدەسۋ سوڭىندا قاسىم- جومارت توقايەۆ جەمقورلىققا قارسى ءىس- قيمىلدى جانە الدىن الۋ شارالارىن كۇشەيتۋگە باعىتتالعان جۇيەلى جۇمىستى جالعاستىرۋ جونىندە ءبىرقاتار ناقتى تاپسىرما بەردى.
