بيىل سالىقتىق جانە كەدەندىك اكىمشىلەندىرۋدەن 1,6 تريلليون تەڭگە تۇسەدى - مينيستر
استانا. KAZINFORM - قازاقستاندا سالىقتىق تەكسەرۋلەر ازايسا دا، سالىقتىق ءوندىرىپ الۋ ەكى ەسەگە ۇلعايدى. بۇل تۋرالى ق ر قارجى ءمينيسترى ءمادي تاكيەۆ ايتىپ بەردى.
«سوڭعى 5 جىلدا سالىقتىق- كەدەندىك اكىمشىلەندىرۋ شارالارى مەن ولاردى سيفرلاندىرۋ ەسەبىنەن رەسپۋبليكالىق بيۋدجەت قوسىمشا 4 تريلليون تەڭگەگە تولتىرىلدى. ونىڭ %23 نەمەسە 932 ميلليارد تەڭگەسى وتكەن 2023 -جىلى تۇسكەن»، - دەدى مينيستر بۇگىنگى ۇكىمەت وتىرىسىندا.
بيىل اكىمشىلەندىرۋگە ارنالعان كىرىس بويىنشا 1,6 تريلليون تەڭگەگە جوسپار قۇرىلعان.
«بۇل - وتە باتىل مىندەت. وعان قول جەتكىزۋ ءۇشىن بىرىنشىدەن، «تازا پاراقتان رەتتەۋ» اياسىندا سالىقتىق تەكسەرۋدى بەلگىلەۋدە تاۋەكەلدەردى باسقارۋ جۇيەسىنىڭ ولشەمشارتتارى قايتا قارالدى. ەندى ولار ناقتى ىرىكتەۋ ادىسىمەن جۇرگىزىلەدى. ناتيجەسى دە ايتارلىقتاي جاقسى. ماسەلەن، 2022 -جىلمەن سالىستىرعاندا سالىقتىق تەكسەرۋ سانى 16%- عا ازايسا دا، سالىقتىق ءوندىرىپ الۋ ەكى ەسەگە ۇلعايدى»، - دەپ ءتۇسىندىردى سپيكەر.
بيىل ءبىرىنشى جارتىجىلدىقتا تەكسەرۋ جۇرگىزۋ ءۇشىن تاۋەكەل دەڭگەيى جوعارى 760 كاسىپكەرلىك سۋبەكتىسى ىرىكتەپ الىنعان.
وعان قوسا، ءىرى سالىق تولەۋشىلەردىڭ، مۇناي سەكتورى مەن تاۋ-مەتاللۋرگيا كەشەنى كاسىپورىندارىنىڭ سالىقتىق الەۋەتىن ارتتىرۋ ماسەلەسى دە بەلسەندى پىسىقتالۋدا.
سونداي- اق، بىزدە الدىن- الۋ بويىنشا بەلسەندى جۇمىس ءجۇرىپ جاتىر، زاڭبۇزۋشىلىقتى قۋدالاعانشا، ونىڭ الدىن العان دۇرىس. وسى ماقساتتا، «ەلەكتروندىق شوت- فاكتۋرا» اقپاراتتىق جۇيەسىندە ەلەكتروندىق شوت- فاكتۋرالاردى تىركەۋ نەمەسە جازىپ بەرۋ كەزىندە ادامدى بيومەتريالىق سايكەستەندىرۋ فۋنكسياسى ىسكە اسىرىلدى. بۇل بوتەن ادامدارعا كومپانيالاردى تىركەۋ، سونداي-اق جالعان شوت-فاكتۋرالاردى جازىپ بەرۋ تاۋەكەلدەرىن الدىن الۋعا مۇمكىندىك بەرەدى
اۆتور
ايجان سەرىكجان قىزى
