بيىل رەسەيدە «ماڭگىلىك پولك» شەرۋى وتپەۋى مۇمكىن

«قوعامدىق قاۋىپسىزدىككە قاۋىپ ءتونىپ تۇرعاندىقتان، رەسەيدىڭ «ماڭگىلىك پولك» ورتالىق شتابى 2024 -جىلى شەرۋدى اشىق وتكىزبەۋ تۋرالى شەشىم قابىلدادى»، - دەدى رەسەيدەگى «ماڭگىلىك پولك» قوعامدىق قوزعالىسى ورتالىق شتابىنىڭ تەڭ ءتوراعاسى - مەملەكەتتىك دۋمانىڭ دەپۋتاتى ەلەنا تسۋنايەۆا.

ول سونداي- اق اكسيانى رەسەيدەن باسقا 60 ەلدە وتكىزۋ جوسپارلانىپ وتىرعانىن حابارلادى. بەلسەندىلەر شەرۋدى جەكە وزدەرى ۇيىمداستىرۋعا ءوتىنىش ءبىلدىردى، ءبىراق ازىرگە ماقۇلدانعان جوق.

«ءبىز ازىرگە كەلىسەتىنىمىزدى نەمەسە كەلىسپەيتىنىمىزدى ايتا المايمىز»، - دەدى ەلەنا تسۋنايەۆا.

ونىڭ ايتۋىنشا، جەڭىس كۇنىنە وراي ەسكە الۋ شارالارى 1-مامىردان باستالادى. رەسەي قالالارىندا قوعامدىق باقتار مەن ساياباقتاردا «ەستەلىك گالەرەيالارى» اشىلادى، مەكتەپتەردە مەموريالدىق جيىندار وتەدى، قوعامدىق كولىكتەردە ۇلى وتان سوعىسى باتىرلارىنىڭ پورترەتتەرى ىلىنەدى.

سونداي- اق دەپۋتات 9-مامىردى مەرەكەلەۋ قارساڭىندا رەسەيدىڭ 22 ايماعىندا ىزدەۋ ەكسپەديتسيالارى باستالعانىن ايتتى.

«9-مامىرعا قاراي ىزدەۋ جۇيەلەرى جاڭا ەسىمدەردى انىقتايدى دەپ ۇمىتتەنەمىز. ءبىز ولار تۋرالى مىندەتتى تۇردە ايتىپ، وتباسىلارى مەن دوستارىن قۋانتاتىن بولامىز»، - دەپ تۇيىندەدى ول.

رەسەيدىڭ «ماڭگىلىك پولك» شەرۋى - 2012 -جىلى ازاماتتاردىڭ باستاماسىمەن پايدا بولعان جالپىۇلتتىق قوزعالىس. «ماڭگىلىك پولك» شەرۋى جەڭىس كۇنىن مەرەكەلەۋدىڭ ءبىر بولىگى. 2019 -جىلى 10 ميلليوننان استام ادام رەسەيدىڭ جۇزدەگەن قالالارىنىڭ كوشەلەرىنە ەكىنشى دۇنيەجۇزىلىك سوعىسىنا قاتىسقان تۋىستارى مەن دوستارىنىڭ پورترەتتەرىن الىپ شىقتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى