بيىل ەلىمىزدە قانشا كومىر وندىرىلەدى

«بيىلدىڭ سوڭىنا دەيىن 112,7 ميلليون توننا كومىر ءوندىرۋ جوسپارلانعان. كومىر ءوندىرۋشى كاسىپورىنداردىڭ جەدەل دەرەكتەرى بويىنشا وسى جىلدىڭ 9 ايىندا 77,7 ميلليون توننا كومىر ءوندىرىلدى. بۇل اقپارات ستاتيستيكالىق دەرەكتەر جاريالانعاننان كەيىن بەكىتىلەدى. مينيسترلىك كوممۋنالدىق- تۇرمىستىق سەكتوردىڭ كومىرمەن قامتاماسىز ەتۋگە جاۋاپتى. كوممۋنالدىق- تۇرمىستىق سەكتورعا جىبەرىلەتىن كومىردىڭ باعاسى ەكى كەن قازباسىندا ءوستى. ەگەر بىلتىر «شۇباركول كومىر» كەنىشىندەگى تونناسى 7100 تەڭگەنى قۇراسا، بيىل ول 8000 تەڭگەگە دەيىن كوتەرىلدى. «قاراجىرا» كەنىشىندە 8500 تەڭگەدەن 8700 تەڭگەگە دەيىن ءوستى. ال «مايكوبە» مەن «شۇباركول پرەميۋم» كەنىشىندەرىندە بىلتىرعى باعاسى وزگەرىسسىز قالدى. كەن ورنىندا «مايكوبە» كومىرى 7100 تەڭگەنى، «شۇباركول پرەميۋمدا» 9000 تەڭگەنى قۇرادى»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

بۇل تۇرعىدا جەرگىلىكتى اتقارۋشى ورگانداردىڭ دەرەكتەرىنە سايكەس، ەلىمىزدىڭ ءار وڭىرىندە كومىر باعاسى 8000-نان 28000 تەڭگەگە دەيىن اۋىتقيدى. سەبەبى كومىر كەنىشىنەن تىم الىستا ورنالاسقان شالعايداعى وڭىرلەر بار. باعانىڭ قالىپتاسۋى كومىردىڭ ماركاسىنا، تۇتىنۋشىعا دەيىن تاسىمالدايتىن قاشىقتىققا، كولىك تۇرىنە، تەمىرجول تاريفتەرىنە جانە تەمىرجول تۇيىقتارىنىڭ ورنالاسۋىنا بايلانىستى.

«جىلۋ بەرۋ ماۋسىمىنا ەلىمىزدە كومىرگە قاجەتتىلىك شامامەن 8,2 ميلليون توننانى قۇرايدى. ونىڭ ىشىندە كوممۋنالدىق-تۇرمىستىق قاجەتتىلىككە - 2,2 ميلليون توننا، حالىققا - 6 ميلليون توننا. بيىلعى 7-قازانداعى جاعداي بويىنشا وڭىرلەرگە تەمىرجول جانە اۆتوموبيل كولىگىمەن 3,3 ميلليون تونناعا جۋىق كومىر جەتكىزىلدى. وڭىرلەردى كومىرمەن قامتاماسىز ەتۋ كورسەتكىشى جىلدىق جوسپارعا قاتىستى %40,2 بولدى. كومىردى جەتكىزۋ جىلۋ بەرۋ ماۋسىمى بارىسىندا جالعاسا بەرەدى، ياعني وسى ارالىقتا وڭىرلەردە قاجەت وتىن كولەمى قامتاماسىز ەتىلەدى»، - دەپ اتالىپ وتكەن ۆەدومستۆو اقپاراتىندا.

بۇدان بۇرىن حابارلانعانداي، ۇكىمەت باسشىسى ولجاس بەكتەنوۆ تۇرعىندار كومىردى تۇراقتى باعامەن ساتىپ الۋى ءۇشىن ەشقانداي قيىندىق بولماۋى كەرەك ەكەنىن تاپسىردى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى