بيىل جەتىسۋ وبلىسىندا 11 بالانىڭ ءومىرى جولدا قيىلدى
تالدىقورعان. KAZINFORM - جەتىسۋ وبلىستىق پوليتسيا دەپارتامەنتى جىل باسىنان بەرى وڭىردە 700 گە جۋىق كولىك وقيعاسى بولعانىن مالىمدەدى. قارا جولدىڭ ۇستىندە 119 ادام قازا بولعان.
ءوڭىر بويىنشا جول-كولىك وقيعاسىنىڭ كورسەتكىشى كوڭىل قۋانتپاي تۇر. وتكەن جىلدىڭ 11 ايىندا 457 جاعداي تىركەلسە، بيىل جىل باسىنان بەرى 700 گە جۋىقتاعان. ونىڭ 340 ى بويىنشا قىلمىستىق ءىس قوزعالعان.
كامەلەتكە تولماعانداردىڭ قاتىسۋىمەن بولعان 290 اپاتتا 11 بالا قايتىس بولىپ، 279 ى جاراقات العان.
زارداپ شەككەن بالالاردىڭ جارتىسىنان كوبى جولاۋشى بولعان.
- جول كولىك وقيعاسىنىڭ نەگىزگى سەبەپتەرى - جول قوزعالىسى ەرەجەلەرىن بۇزۋ جانە ونىڭ %90 جۇرگىزۋشىلەردىڭ كىناسىنەن بولادى. ولاردىڭ ىشىندە جىلدامدىقتىڭ ارتۋى، قارسى جولاققا شىعۋ، مانيەۆر جاساۋ قاتەلىكتەرى، سونداي-اق جاياۋ جۇرگىنشىلەر مەن سكۋتەر جانە ساموكات جۇرگىزۋشىلەرى تاراپىنان بۇزۋشىلىقتار بار، - دەدى جەتىسۋ وبلىستىق پوليتسيا دەپارتامەنتى انىقتاۋ باسقارماسىنىڭ انىقتاۋشىسى ادىلەت مىڭبايەۆ.
پوليتسيا قىزمەتكەرلەرى كىسى ولىمىمەن اياقتالعان جول-كولىك وقيعاسى ءۇشىن ق ر ق ك 345-بابىندا 10 جىلعا دەيىن باس بوستاندىعىنان ايىرۋ جازاسى قاراستىرىلعانىن جانە جۇرگىزۋشىلەرگە جول ەرەجەسىن قاتاڭ ساقتاۋدى ەسكەرتەدى.
ەسكە سالايىق، وسىعان دەيىن جەتىسۋ وبلىسىندا كولىك اپاتىنان 2 ادامنىڭ قايتىس بولعانىن جازعانبىز.
