بيىل ءبىرقاتار اۋەجايدا ۇشۋ قاۋىپسىزدىگىن جەتىلدىرۋ جۇمىستارى ىسكە اسادى

- پرەزيدەنتتىڭ 2024-جىلعى جولداۋىندا بەرگەن تاپسىرماسىنا سايكەس ىشكى تۋريزمدى جانە جولاۋشىلار اۋە تاسىمالىن دامىتۋ ءۇشىن بيىل زايسان، كاتونقاراعاي جانە كەندىرلى كۋرورتتىق ايماقتارىندا جاڭا ءۇش اۋەجايدىڭ قۇرىلىسى باستالادى. بۇل جوبالاردىڭ ىسكە اسىرىلۋى وڭىرلەردەگى ەكونوميكانىڭ دامۋىنا جاڭا قارقىن بەرەدى، سونداي-اق وتاندىق ءارى شەتەلدىك تۋريستەر اعىنىن ارتتىرۋعا، جەرگىلىكتى تۇرعىنداردى قوسىمشا جۇمىس ورىندارىمەن قامتاماسىز ەتۋگە سەپتىگىن تيگىزەدى. سونىمەن قاتار، ەلىمىزدىڭ ءبىرقاتار اۋەجايىندا ۇشۋ قاۋىپسىزدىگىنىڭ جاي-كۇيىن جاقسارتۋعا باعىتتالعان اۋەجايلاردىڭ جەر ءۇستى ينفراقۇرىلىمى وبەكتىلەرىن جاڭعىرتۋ بويىنشا جۇمىستار جوسپارلى تۇردە اتقارىلىپ جاتىر، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ماسەلەن، اقتاۋ قالاسىنىڭ اۋەجايىندا 2025-جىلدىڭ كوكتەمىندە ۇشۋ-قونۋ جولاعىن، تاكسي جولدارى مەن پەررونداردى كۇردەلى جوندەۋدى جالعاستىرۋ جوسپارلانعان.

- پاۆلودار قالاسىنىڭ اۋەجايىندا ۇشۋ- قونۋ جولاعىن، تاكسي جولدارىن قايتا جاڭارتۋ جوسپارلانعان. سونداي-اق، بيىل بالقاش قالاسىنىڭ اۋەجايىندا اەروۆوكزال عيماراتىن قايتا جاڭارتۋ قاراستىرىلعان. بۇل جۇمىستار اۋە ساپارىنىڭ قاۋىپسىزدىگى مەن جۇيەلىلىگىن قامتاماسىز ەتۋگە، سونداي-اق يكاو حالىقارالىق ستاندارتتارىنا سايكەس كەلتىرۋگە باعىتتالعان، - دەپ اتالىپ وتكەن ۆەدومستۆو اقپاراتىندا.

ەسكە سالا كەتەيىك، بۇعان دەيىن كولىك مينيسترلىگى 3 جاڭا اۋەجايدىڭ جوبالاۋ قۇجاتتارىن ازىرلەۋگە كىرىسكەنىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى