بيىل بۋرابايعا 600 مىڭنان استام تۋريست كەلگەن
پرەزيدەنت ءىس باسقارۋشىسى ايبەك دادەبايەۆ «بۋراباي» ۇلتتىق ساياباعى مەن «بۋراباي دامۋ» كاسىپورنىندا تۋريزمدى دامىتۋ ءىسى قالاي جۇزەگە اسىپ جاتقانىن ايتىپ بەردى.
پرەزيدەنت ءىس باسقارماسىنا قاراستى «بۋراباي» ۇلتتىق ساياباعى مەن «بۋراباي دامۋ» كاسىپورنى - ەلىمىزدە ءتۋريزمدى دامىتۋعا، اسەم تابيعاتتى قورعاۋعا ەرەكشە ۇلەس قوسىپ جۇرگەن ىرگەلى مەكەمەلەر.
«بيىل قاڭتار-قازان ايلارىندا ۇلتتىق پارككە كەلۋشىلەردىڭ جالپى سانى 600 مىڭنان استى. ارينە، سارىارقانىڭ جاۋھارى سانالاتىن ولكەگە حالىقتىڭ قىزىعۋشىلىعى ارتىپ كەلە جاتقانى قۋانتادى. دەگەنمەن، ادام اياعى كوبەيگەن سايىن، تۇمسا تابيعاتتى ساقتاۋ ىسىنە دە سوعۇرلىم كوبىرەك ماڭىز بەرۋگە تۋرا كەلەتىنىن ەسكەرگەن ءجون. وسىعان دەيىن كۋرورتتىق ايماقتا Smart National Park Burabay جوباسىنىڭ ەكى كەزەڭى جۇزەگە اسىرىلعان بولاتىن. ءۇشىنشى كەزەڭ شەڭبەرىندە عىلىمي- زەرتتەۋ جۇمىستارىن باستاۋ، 5 وتكىزۋ- باقىلاۋ بەكەتىن اۆتوماتتاندىرۋ، قورشاعان ورتانى باقىلاۋعا جانە مونيتورينگ جاساۋعا ارنالعان 3 بەينەكامەرا قويۋ سىندى ينفراقۇرىلىمدىق جۇمىستار قولعا الىندى»،-دەيدى ايبەك دادەبايەۆ.
ونىڭ ايتۋىنشا، قازىر بىرنەشە سەكۋند ىشىندە كولىكتىڭ ءتۇرىن، ماركاسىن جانە مەملەكەتتىك ءنومىرىن تىركەۋگە الىپ ۇلگەرەتىن اۆتوماتتى جۇيە تەستىلىك رەجيمدە ىستەپ تۇر.
بۇل بەكەتتەردە كەپتەلىس تۋىنداماۋىنا، جەمقورلىق قاتەرلەرىن بولدىرماۋعا، جۇرگىنشىلەرگە قولايلى جاعداي جاساۋعا ىقپال ەتەدى.
«وسى ورايدا Smart National Park Burabay جۇيەسى ءورتتىڭ الدىن الۋ، براكونەرلەردىڭ جولىن كەسۋ سىندى جۇمىستارعا دا وڭ اسەرىن تيگىزگەنىن اتاپ وتكىم كەلەدى. ون اي ىشىندە ۇلتتىق پارك اۋماعىنداعى تۋريستىك مارشرۋتتاردا سەرۋەندەگەن ادام سانى 33 مىڭنان اسىپ ءتۇستى. حالىقتىڭ قىزىعۋشىلىعى جوعارى ەكەنىنە كوز جەتتى. سول ءۇشىن شۋچە جانە بۋراباي كولدەرىن اينالا سالىنعان ۆەلوجولدار مەن جاياۋ جۇرگىنشىلەرگە ارنالعان سوقپاقتار ءالى دە ۇزارا ءتۇسىپ، بيىل اقبۋرا كۋرورتىنا دەيىن جەتۋگە ءتيىس. الداعى ۋاقىتتا قوسىمشا 8 شولۋ الاڭىن، كولىك قوياتىن 4 الاڭ سالىنادى دەپ جوسپارلانىپ وتىر. كۋرورتتىق ايماقتا بايلانىس پەن ينتەرنەت جۇيەسىن جەتىلدىرە ءتۇسۋ ءۇشىن جاڭادان ۇيالى بايلانىس ستانتسيالارى سالىنا باستايدى، بۇرىنعى بازالىق ستانتسيالار جاڭارتىلادى»،- دەپ اتاپ ءوتتى پرەزيدەنتتىڭ ءىس باسقارۋشىسى.
جىلما- جىل ورمان القابىن ۇلعايتىپ وتىرۋ ءىسى دە جوسپار بويىنشا ءجۇرىپ جاتىر. بيىل اقىلباي ورمان شارۋاشىلىعىنىڭ اۋماعىنان جاڭا ءتالىمباق سالۋ ءۇشىن 50 گەكتار جەر بەلگىلەندى.
ورمانشىلار تۇراتىن كوردوندار مەن كەڭسەلەردىڭ ءبىرازى جاڭارىپ، 6 ورمان شارۋاشىلىعىنىڭ ينسپەكتورلارى جاڭا قونىسقا كوشىپ ۇلگەردى.
«جوعارىدا ايتىپ وتكەنىمدەي، ءتۋريزمدى دامىتۋ مەن قورشاعان ورتانى قورعاۋ جۇمىستارى ءبىر-بىرىمەن تىعىز بايلانىستى. حالىق سانى ارتقان سايىن، ينفراقۇرىلىمدى دا جەتىلدىرىپ وتىرۋ كەرەك. وسى ورايدا، „بۋراباي“ ۇلتتىق پاركى مەن „بۋراباي دامۋ“ كاسىپورنى جەرگىلىكتى اكىمدىكپەن بىرلەسىپ، قوقىستى ۋاقىتىلى شىعارۋ، تابيعات اياسىندا تازالىقتى قامتاماسىز ەتۋ جۇمىستارىنا باسا نازار اۋدارىپ كەلەدى. جالپى تۋريستىك وڭىردە جۇرتشىلىققا قولايلى جاعداي جاساۋ جۇمىستارى جۇيەلى تۇردە جالعاسا بەرەدى»،-دەيدى ايبەك دادەبايەۆ.
اۆتور
جانات قاپالبايەۆا
