بيىل اتىراۋدا ماسا ۋلاۋعا 193,6 ميلليون تەڭگە بولىنگەن
اتىراۋ. KAZINFORM - بيىل اتىراۋ قالاسىنىڭ اكىمدىگى ماسانى ۋلاۋ جۇمىسىنا 193 ميلليون 648 مىڭ تەڭگە ءبولدى. قازىر بۇل جۇمىستى اتقارۋعا ەكى كومپانيا كىرىستى.
اتىراۋ قالالىق تۇرعىن ءۇي-كوممۋنالدىق شارۋاشىلىق جانە تۇرعىن ءۇي ينسپەكسياسى ءبولىمىنىڭ باس مامانى ەلتاي ايباتوۆتىڭ ايتۋىنشا، كوپقاباتتى 1200-دەن استام تۇرعىن ءۇيدىڭ جەرتولەسى مەن كىرەبەرىسىن ماساعا قارسى دەزينفەكسيالاۋ باستالدى.
- ماساعا قارسى دەزينفەكسيا جۇمىستارى قالانىڭ ەكى بولىگىندە جۇرگىزىلەدى. مەردىگەر «AG Disinfection services» ج ش س جايىق وزەنىنىڭ وڭ جاق، ال «ARTS» ج ش س سول جاعالاۋدا دەزينفەكسيالاۋدى قولعا الدى. وسىعان بايلانىستى تۇرعىندار تاراپىنان ارىز- شاعىمدى قالالىق تۇرعىن ءۇي-كوممۋنالدىق شارۋاشىلىق جانە تۇرعىن ءۇي ينسپەكسياسى ءبولىمى جانە 109 ءبىرىڭعاي بايلانىس ورتالىعى ارقىلى قابىلدانادى. دەزينفەكسيالاۋ جۇمىسى قاي ۇيلەردە جۇرگىزىلەتىنى پاتەر يەلەرى كووپەراتيۆتەرىنە الدىن الا حابارلانىپ، تۇرعىندارعا ەسكەرتىلەدى، - دەيدى ەلتاي ايباتوۆ.
ونىڭ ايتۋىنا قاراعاندا، ماساعا قارسى ۋلاۋ شاھار ماڭىنداعى ەلدى مەكەندەردە، اشىق سۋ الاڭدارى مەن ساياباقتا، كوشەلەردە جالعاسادى. قازىر اتىراۋ قالاسىنىڭ وڭ جاعالاۋىندا 8 ادام مەن 8 تەحنيكا، ال سول جاق جاعالاۋدا 6 ادام مەن 6 تەحنيكا تارتىلعان.
اكىمدىكتىڭ مالىمەتىنشە، اشىق ەلەكتروندىق كونكۋرستىڭ قورىتىندىسىمەن 2 مەردىگەر انىقتالعان. ونىڭ ءبىرى - «AG Disinfection services» ج ش س- عا 99 ميلليون 680 مىڭ تەڭگە، ال ەكىنشىسى - «ARTS» ج ش س- عا 93 ميلليون 968 مىڭ تەڭگە بولىنگەن.
«ARTS» ج ش س- نىڭ جوبا مەنەدجەرى ماقسات جاڭايەۆتىڭ پىكىرىنشە، ماساعا قارسى دەزينفەكسيالاۋعا قولدانىلاتىن بىرنەشە پرەپارات بار. ونىڭ قورشاعان ورتاعا دا، ادامدارعا دا زيانى جوق.
- دەزينفەكتسيالاۋ جۇمىستارىنا اگران، سيپەررمەترين، انتي- ينسەكتا، فاسكون پرەپاراتتارىن قولدانامىز. جۇمىستار ارنايى كەستەگە ساي اتقارىلادى، - دەيدى ماقسات جاڭايەۆ.
ەسكە سالا كەتەلىك، بۇدان بۇرىن اتىراۋدا 8-9 -ساۋىردە جىلۋ جەلىلەرىندە تەمپەراتۋرا پارامەترى كوتەرىلەتىنىن حابارلاعان ەدىك.
اۆتور
جولداسبەك شوپەعۇل
