بيىل اقمولالىق شارۋالار 6,6 ميلليون توننا رەكوردتىق استىق جينادى
استانا. KAZINFORM - اقمولا وبلىسى بيىل اۋىل شارۋاشىلىعى ونىمىنەن 1 تريلليون تەڭگەدەن استام پايدا تاپتى، بۇل وتكەن جىلمەن سالىستىرعاندا 1,5 ەسە ارتىق. بۇل تۋرالى اقمولا وبلىسىنىڭ اكىمى مارات احمەتوجانوۆ ءمالىم ەتتى.
- بيىل ءبىزدىڭ وبلىس استىق جيناۋدا ايتارلىقتاي ناتيجەگە قول جەتكىزىپ، ەلدىڭ نەگىزگى استىق القابى دەگەن مارتەبەسىن دالەلدەدى. ءبىزدىڭ ماقسات - اۋىل شارۋاشىلىعى سالاسىن ءوڭىر ەكونوميكاسىنىڭ باستى درايۆەرىنە اينالدىرۋ. بيىل اۋىل شارۋاشىلىعى ونىمىنەن 1 تريلليون تەڭگەدەن استام كىرىس ءتۇستى، بۇل وتكەن جىلمەن سالىستىرعاندا 1,5 ەسە ارتىق. ءوڭىر ديقاندارى 6,6 ميلليون توننا رەكوردتىق استىق جينادى. ءار گەكتاردان 14 سەنتنەردەن استام استىق جينالدى. استىقتىڭ 60 پايىزدان استامى تاۋارلىق ساپاسى جوعارى بيداي. ارينە، بۇل ەڭ باستىسى ديحانداردىڭ قاجىرلى ەڭبەكتەرى، مەملەكەتتىك قولداۋ مەن زاماناۋي تەحنولوگيالاردى ءتيىمدى ءارى ۋاقتىلى قولدانۋ ناتيجەسى - ، دەدى مارات احمەتجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
اكىم ۇسىنعان مالىمەتكە سۇيەنسەك، وڭىردە بيىل 1239 جاڭا تەحنيكا ساتىپ الىندى، ونىڭ ىشىندە 334 تەحنيكا جەڭىلدەتىلگەن ليزينگ باعدارلاماسى بويىنشا الىندى.
ودان ءارى وبلىس اكىمى اقمولا وبلىسىنىڭ ەلوردانى ازىق- تۇلىكپەن قامتۋداعى رولىنە توقتالدى.
- ەلوردا تۇرعىندارىنىڭ ءسۇت ءونىمىنىڭ 50 پايىزدان استامىن، ەت ءونىمىنىڭ 30 پايىزىن، جۇمىرتقانىڭ 80 پايىزىن، كارتوپتىڭ 85 پايىزىن قامتىپ وتىرمىز. ناقتى ايتقاندا، استانا تۇرعىندارىنا كۇن سايىن 80 توننا ەت ونىمدەرى، 320 توننا ءسۇت اسسورتيمەنتى، 700 مىڭ جۇمىرتقا جانە 25 توننا ۇن جەتكىزىلەدى. استانانى ازىق- تۇلىكپەن قامتۋعا زور ۇلەس قوساتىن ءبىرقاتار كاسىپورىن بار. الداعى ۋاقىتتا ولاردىڭ سانى ارتا تۇسەدى، - دەيدى م. احمەتجانوۆ.
