بيىل الماتىدا 30 سەيسميكالىق ستانسيا ورناتىلادى
الماتى. KAZINFORM - الماتىدا سەيسميكالىق قاۋىپتىڭ الدىن الۋ ماقساتىندا 28 سەيسميكالىق ستانسيا جۇمىس ىستەپ تۇر.
الماتى اكىمى ەربولات دوسايەۆ قىتايعا رەسمي ساپارى بارىسىندا ق ح ر جەر سىلكىنىستەرى اگەنتتىگىنىڭ پرەزيدەنتى ۆان كۋنمەن كەزدەستى.
- قازاقستان اۋماعىنىڭ %40- دان استامى جەر سىلكىنىسى قاۋپى بار ايماقتا ورنالاسقان. ءبىز ەۋرازياداعى سەيسميكالىق بەلدەۋلەر جۇيەسىنە كىرەمىز. ال الماتىنىڭ ءوزى سەيسميكالىق بەلسەندى ايماقتا ورنالاسقان. سوندىقتان «الماتى قالاسىن 2025 -جىلعا دەيىن دامىتۋ جانە 2030 -جىلعا دەيىنگى ورتا مەرزىمدى پەرسپەكتيۆالارى» باعدارلاماسىندا سەيسميكالىق قاۋىپسىزدىكتى قامتاماسىز ەتۋ نەگىزگى باسىمدىقتىڭ ءبىرى، - دەدى ەربولات دوسايەۆ.
ونىڭ ايتۋىنشا، الماتىدا كۇشتى جەر سىلكىنىستەرىن بولجاۋ جانە ەرتە حابارلاۋ ءۇشىن 28 ستانسيا جۇمىس ىستەيدى، قوسىمشا 70 ستانسيا ورناتۋ جوسپارلانعان. بيىل 30 ستانسيا ورناتىلسا، 2026 -جىلدىڭ سوڭىنا دەيىن تاعى 40 ستانسيا ىسكە قوسىلادى.
الماتى اكىمدىگىنەن اتاپ وتكەندەي، كەزدەسۋ قورىتىندىسى بويىنشا قازاقستاننىڭ سەيسمولوگيالىق بايقاۋ جانە زەرتتەۋلەر ۇلتتىق عىلىمي ورتالىعى مەن قىتايدىڭ جەر سىلكىنىستەرى اگەنتتىگىنىڭ گەوفيزيكا ينستيتۋتى اراسىندا سەيسميكالىق مونيتورينگ جانە ەرتە حابارلاۋ جۇيەلەرىن بىرىكتىرۋ بويىنشا بىرلەسكەن جۇمىس تۋرالى كەلىسىمگە قول قويىلدى.
بۇل قۇجات ەكى ەل ماماندارىنا سەيسميكالىق اقپاراتپەن ناقتى ۋاقىت رەجيمىندە الماسۋعا مۇمكىندىك بەرەدى.
وسىعان دەيىن الماتىدا جەر سىلكىنىسىنە ارنالعان سيمۋلياتسيالىق وقۋ ورتالىعى اشىلاتىنى تۋرالى جازعان ەدىك.
ايتا كەتەيىك، الماتىداعى 5600 عيمارات جەر سىلكىنىسىنە ءتوزىمسىز.
اۆتور
الما مۇقانوۆا
